Kush tha se videolojërat nuk mund të paguajnë faturat? Kompania amerikane Kalshi është bërë virale në rrjetet sociale pasi publikoi një ofertë pune me pagë 120 mijë dollarë në vit për të luajtur GTA 6.
Pozicioni quhet GTA VI Researcher dhe ka një detyrë të pazakontë: kandidati i përzgjedhur duhet të nisë lojën sapo ajo të publikohet, më 19 nëntor, në mesnatë, dhe të vazhdojë të luajë derisa të përfundojë historinë kryesore.
Por puna nuk përfundon këtu. Lojtari duhet të transmetojë të gjithë eksperiencën online, të studiojë ekonominë virtuale të Leonida, vendit ku zhvillohet GTA 6, dhe të analizojë ndikimin që publikimi i lojës mund të ketë në ekonominë reale.
Lexo edhe: GTA 6 zbulon makinat e reja, nga modelet klasike te supermakinat moderne
Në fund, kandidati do të prezantojë edhe një raport zyrtar të titulluar “State of the Leonida Economy”, ku do të analizojë ekonominë brenda lojës.
Pozicioni ofron mundësinë për të punuar nga distanca, por ka disa kërkesa. Kandidatët duhet të jenë mbi 18 vjeç, të kenë të paktën 10 vite eksperiencë me videolojërat dhe mbi 3 vite eksperiencë në transmetimin e tyre online.
Oferta ka tërhequr vëmendje në internet, veçanërisht mes lojtarëve që dikur dëgjonin nga prindërit se videolojërat ishin thjesht humbje kohe.
Tani pyetja është: A do ta linit punën tuaj për t’u paguar 120 mijë dollarë në vit duke luajtur GTA 6?


