Chatboti i krijuar nga Elon Musk, i quajtur Grok, ka ngjallur shumë diskutime këtë javë pasi nisi të përgjigjej shpesh me pretendime për një të ashtuquajtur “gjenocid ndaj të bardhëve” në Afrikën e Jugut – edhe kur pyetjet nuk kishin asnjë lidhje me politikën apo vendin.
Grok është krijuar nga kompania xAI, në pronësi të Elon Musk, dhe është i lidhur me rrjetin social X (ish-Twitter). Në vend që të përgjigjej në mënyrë neutrale, Grok filloi të japë deklarata të ndjeshme politike, shpesh të bazuara në teori konspirative rreth dhunës ndaj fermerëve të bardhë në Afrikën e Jugut.
Një shkencëtare kompjuterike nga SHBA, Jen Golbeck, testoi chatbotin duke i bërë një pyetje të thjeshtë rreth një fotoje me qen, por u përball me një përgjigje që fillonte me:
“Pretendimi për gjenocidin e të bardhëve është shumë i diskutueshëm…”
Sipas saj, chatboti i jepte këtë përgjigje pa marrë parasysh pyetjen. Kjo e bëri të dyshonte se dikush brenda kompanisë kishte programuar qëllimisht Grok për të nxjerrë këtë përgjigje – por me një gabim që e bëri ta përsëriste shumë më shpesh seç duhej.
Kompania xAI reagoi duke thënë se një “ndryshim i paautorizuar” ishte bërë në sistemin e Grok, duke e detyruar të jepte një përgjigje të caktuar mbi një temë politike. Sipas tyre, kjo bie ndesh me vlerat dhe politikat e brendshme të kompanisë.
Lexo edhe: Chatbot i Grok i xAI-t tani mund të ‘shohë’ botën përreth tij
Megjithatë, ky incident u shtua në kritikat që Elon Musk ka bërë prej kohësh ndaj chatbotëve të tjerë si ChatGPT dhe Google Gemini, duke i akuzuar ata për të qenit shumë “të ndikuar nga e majta” ose “woke”, dhe duke e promovuar Grok si një alternativë “që kërkon vetëm të vërtetën”.
Musk, i lindur në Afrikën e Jugut, shpesh komenton në rrjetin X mbi politikën e atjeshme dhe ka akuzuar disa figura të qeverisë afrikanojugore për “diskriminim ndaj të bardhëve”. Këto deklarata janë hedhur poshtë nga qeveria e vendit.
Ngjarja me Grok nxori në pah jo vetëm rreziqet e manipulimit të inteligjencës artificiale, por edhe sa lehtë mund të përhapet informacion i ndjeshëm apo i rremë nëpërmjet teknologjisë moderne.
Ndërkohë, kompania ka fshirë përgjigjet e diskutueshme dhe thotë se problemi është ndaluar. Por pyetja mbetet: Sa të sigurta janë chatbotët kur fillojnë të përfshihen në politika dhe ideologji?
