Kriminelët kibernetikë vjedhin të dhënat e klientëve dhe kërkojnë 20 milionë dollarë nga kjo kompani

Kompania amerikane Coinbase, një nga platformat më të mëdha për shkëmbimin e kriptomonedhave, ka njoftuar se është përballur me një sulm kibernetik. Kriminelët kanë arritur të vjedhin të dhëna personale të disa klientëve dhe kanë kërkuar 20 milionë dollarë për të mos i publikuar ato.

Sipas CEO-së së kompanisë, Brian Armstrong, disa punonjës të shërbimit të klientit jashtë SHBA-së janë korruptuarnga kriminelët dhe u kanë dhënë atyre të dhëna si emrat, datëlindjet dhe pjesë nga numrat e identitetit të klientëve.

Këto të dhëna më pas janë përdorur për mashtrime, ku kriminelët janë shtirur si përfaqësues të Coinbase dhe kanë tentuar të bindin klientët të dërgojnë kriptomonedhat e tyre.

Coinbase nuk ka dhënë një numër të saktë të klientëve të prekur, por ka premtuar kompensim për këdo që ka rënë pre e këtyre mashtrimeve.

Lexo edhe: Melania Trump lançon kriptomonedhën e saj ndërsa industria e kriptove po thyen rekorde

Në një dokument zyrtar të dërguar në autoritetet amerikane, kompania tha se do të duhet të shpenzojë deri në 400 milionë dollarë për të zgjidhur situatën dhe për të dëmshpërblyer klientët.

Punonjësit e përfshirë në këtë shkelje janë larguar nga puna, dhe kompania thotë se tashmë ka forcuar masat për parandalimin e mashtrimeve në të ardhmen.

Sulmuesit kërkuan pagesën e 20 milionë dollarëve në Bitcoin, por Coinbase refuzoi të paguajë. Në vend të kësaj, kompania ofroi një shpërblim prej 20 milionë dollarësh për këdo që jep informacion që çon në arrestimin e tyre.

Armstrong përfundoi mesazhin e tij me një paralajmërim:

“Për këdo që përpiqet të dëmtojë klientët tanë, dijeni që do të ndiqeni penalisht dhe do të përballeni me drejtësinë.”