Në vitin 2011, ish-presidenti Barack Obama e pyeti Steve Jobs pse Apple nuk prodhonte iPhonet në SHBA. Sot, Donald Trump po e risjell këtë debat, duke kërkuar që iPhonet që shiten në Amerikë të prodhohen brenda vendit. Ai ka kërcënuar me një tarifë 25% nëse Apple nuk e zhvendos prodhimin nga vende si India apo Kina.
CEO i Apple, Tim Cook, ka thënë së fundmi se shumica e iPhone-ve që do të shiten në SHBA do të vijnë nga India. Megjithatë, ekspertët shprehen se zhvendosja e prodhimit në SHBA do të ishte shumë e vështirë dhe e kushtueshme, pasi vendet si Kina dhe India kanë punonjës të specializuar dhe një industri të ndërtuar për këtë lloj prodhimi.
Ndërtimi i një infrastrukture të ngjashme në SHBA do të kërkonte vite dhe investime të mëdha. Kina ka fabrika të mëdha si Foxconn me qindra mijëra punëtorë që jetojnë në konvikte për të qenë të gatshëm të punojnë me orare fleksibël. Ndërkohë, në SHBA vetëm 8% e fuqisë punëtore është në sektorin e prodhimit.
Apple ka njoftuar një investim prej 500 miliardë dollarësh në SHBA për katër vitet e ardhshme, për të mbështetur kërkimin shkencor, inteligjencën artificiale dhe për të hapur akademi trajnimi. Megjithatë, këto investime nuk janë të fokusuara në ndërtimin e iPhone-ve, por në mbështetjen e bizneseve të vogla dhe zhvillimin e teknologjisë.
Sipas analistëve, edhe nëse Apple do të zhvendoste një pjesë të prodhimit në SHBA, do t’i duhej të ndryshonte dizajnin e iPhone për të përfshirë më shumë automatizim dhe të përballej me mungesë të furnitorëve lokalë. Rreth 90% e komponentëve të iPhone ende prodhohen në Kinë.
Për momentin, zhvendosja totale e prodhimit në SHBA duket pak e mundshme. Apple duhet të gjejë një balancë mes kërkesave politike dhe realitetit ekonomik e teknologjik, për të ruajtur cilësinë dhe çmimin konkurrues të iPhone-ve.
