CEO i DeepMind: Problemi më i madh i AI nuk është që do na marrë punët

Demis Hassabis, drejtuesi i DeepMind – krahu kërkimor i inteligjencës artificiale në Google – nuk është shumë i shqetësuar për idenë se AI do të shkaktojë një “apokalips punësimi”.

Në vend të kësaj, ai paralajmëron për rrezikun që AI të bjerë në duar të gabuara dhe për mungesën e rregullave të qarta për përdorimin e modeleve të avancuara dhe autonome.

“Që të dyja janë rreziqe reale dhe sfiduese,” tha Hassabis në një intervistë gjatë festivalit SXSW në Londër.

Kjo vjen në një kohë kur CEO i kompanisë Anthropic paralajmëroi se AI mund të zhdukë deri në gjysmën e vendeve të punës në nivelet fillestare të sektorit administrativ. Por sipas Hassabis, rreziku më i madh është që një “aktor i keq” mund të përdorë teknologjinë për qëllime të dëmshme, veçanërisht kur bëhet fjalë për AI të përgjithshme (AGI) – një formë teorike e inteligjencës artificiale që do të arrinte nivelin e inteligjencës njerëzore.

“Për ne sfida është: si t’u kufizojmë qasjen këtyre sistemeve aktorëve të këqij, por në të njëjtën kohë të lejojmë përdoruesit e mirë të krijojnë gjëra të mrekullueshme?” – shtoi ai.

Rreziqet janë tashmë reale: FBI njoftoi se hakerët po përdorin AI për të imituar zyrtarë të qeverisë amerikane përmes zërit, ndërsa raporte të tjera kanë evidentuar përdorimin e AI në prodhimin e “deepfake”-ve dhe materiale të tjera mashtruese. Ligji i fundit “Take It Down Act” ka për qëllim të ndalojë përhapjen e përmbajtjes eksplicite të krijuar pa pëlqim.

Hassabis kërkon një marrëveshje ndërkombëtare për mënyrën se si duhet përdorur AI, dhe si të sigurohet që teknologjia të përdoret vetëm për të mirën. Edhe pse kjo duket e vështirë në një klimë aktuale gjeopolitike të tensionuar, ai beson se domosdoshmëria për rregulla do bëhet më e qartë me kohën.

Pavarësisht shqetësimeve për punët, Hassabis nuk beson se AI do t’i bëjë njerëzit të panevojshëm. Ai parashikon që AI do të krijojë role të reja dhe do të rrisë produktivitetin, siç ndodhi me shpikjen e internetit. Megjithatë, ai thekson se shoqëria duhet të gjejë mënyra për të shpërndarë përfitimet e reja ekonomike që do të sjellë kjo teknologji.

“Gjithmonë ka pasur ndryshime të mëdha teknologjike,” tha ai. “Dhe zakonisht, ato kanë sjellë punë edhe më të mira. Tani mbetet të shohim nëse kjo do të jetë rradha tjetër e atyre ndryshimeve.”