A mund ta përshpejtojë Inteligjenca Artificiale anëtarësimin tonë në BE?

Më 13 dhjetor Kryeministri Edi Rama viziton Brukselin në kuadër të procesit të anëtarësimit të Shqipërisë në Bashkimin Europian, ku sipas fjalës së mbajtur në Kongresin e Jashtëzakonshëm të Partisë Socialiste më 8 dhjetor “kur të mbarojë mbledhja, do t’ia lë si kartolinë suksesin e modelit shqiptar të inteligjencës, për vendosjen e 280 mijë faqe masa të legjislacionit të BE-së“.

Në këtë kongres, Kryeministri shprehu hapur besimin mbi rezultatet që mund të përftohen nga Inteligjenca Artificiale për përshpejtimin e procesit të anëtarësimit. Ai u shpreh se krijuesja e ChatGPT, shqiptarja Mira Murati, do të arrijë me ndihmën e inteligjencës artificiale futjen në legjislacionin shqiptar rreth 4000 akte ligjore, të cilat janë të domosdoshme për anëtarësimin në BE.

Nuk është hera e parë që Rama shprehet rreth AI. Për Kryeministrin, Inteligjenca Artificiale është zgjidhja për të ndalur korrupsionin lidhur me tenderat.

“Kemi nisur edhe një punë shumë inovative me mbështetjen dhe asistencën direkte të Microsoft-it për inteligjencën artificiale që do të na lehtësoje besojmë ne procese të caktuara duke filluar që nga procesi i prokurimeve publike  për të cilin kemi një projekt shumë ambicioz që do të kërkojë kohën e vet, por ne jemi besimplotë që brenda këtij mandati, do të kemi një sistem komplet të revolucionarizuar të prokurimeve publike, me shumë më tepër komponentë teknologjikë dhe me shumë më pak komponentë njerëzorë në mënyrë që prokurimet të jenë sa më transparente dhe sa më të drejta në të gjitha nivelet.”– tha Rama.

Tendera me Inteligjencë Artificiale? A mund ta ndalë AI korrupsionin në Shqipëri?

Gjatë kongresit të 8 Dhjetorit Rama u shpreh se ndryshe nga vendet e tjera ku i gjithë procesi ka zgjatur deri në 9 vite, Shqipëria do ta bëjë shumë herë më shpejt.

Unë jam i bindur që gjithkush mendon që kjo është retorikë por nuk është retorikë është fakt i mbështetur në argumenta konkretë. Unë po sjell këtu vetëm dy. I pari është tejet teknik, që një vend të jetë teknikisht gati që të bëhet pjesë e Bashkimit Europian duhet të ketë legjislacionin e Bashkimit Evropian. 

Kjo do të thotë që të vendosë Shqipëria 280 mijë faqe, 3484 masave ligjore të KE-së ose ndryshe ne do të miratojmë mbi 4000 akte ligjore dhe nënligjore. Që kur Shqipëria ka nisur ta bëjë këtë me BE-në, shumë vite më parë, ka arritur të bëjë ndërvendosjen e vetëm 510 masave. Tradicionalisht kjo punë kolosale, për vendin që e ka kaluar këtë gjë përpara nesh ka zgjatur 7-9 vjet. Shqipëria do ta bëjë këtë shumë më shpejt se ata pararendës. Ky nuk është, prapë po e them, qëndrim retorik por argument i mbështetur në shkencë, inovacion e teknologji. Askush nga ne nuk e kishte dëgjuar më parë emrin e një vajze vlonjate, një talent, Mira Murati. 

E dëgjuam të gjithë njëkohësisht bashkë me gjithë botën kur ajo mahniti me krijesën e inteligjencës artificiale ChatGPT. 

Ju e dini si është jeta të gjithë kanë fiksimet e tyre, dhe unë timin, e kërkoj Mira Muratin dhe ajo më jep një takim telefonik. Mora guximin për t’i kërkuar ndihmë, për ta bërë Shqipërinë pjesë më shpejt të BE-së. Ajo qeshi sepse mendoi se po bëja humor. 

A është e mundur të fusim mijëra përkthyes dhe të shfrytëzojmë miliona, për të bërë gati malin e masave të BE-së nëpërmjet ChatGPT?

Po më duket e mundur, mu përgjigj. Kështu nisi puna me të dhe grupin që u krijua”, tha Rama.