Microsoft bëhet kompania e radhës që kap vlerën prej 4 trilionë dollarësh

Microsoft ka hyrë zyrtarisht në klubin elitë të kompanive me vlerë tregu mbi 4 trilionë dollarë, duke u bërë kompania e dytë që arrin këtë sukses, pas raportit mbresëlënës të fitimeve  që nxiti rritjen e aksioneve të gjigantit të teknologjisë.

Aksionet e Microsoft (MSFT) u rritën me pothuajse 4.5% pas hapjes së tregjeve të enjten, duke çuar vlerën e saj tregtare në nivelin intraditor prej 4.01 trilionë dollarësh. Që nga fillimi i këtij viti, aksionet e kompanisë janë rritur me rreth 28%. Ky moment historik vjen vetëm një vit e gjysmë pasi Microsoft arriti vlerën prej 3 trilionë dollarësh. Kompania kishte kaluar për herë të parë kufirin e 1 trilion dollarëve në prill të vitit 2019. Pas Nvidia-s, e cila arriti këtë prag në fillim të këtij muaji, Microsoft bëhet kompania e dytë që hyn në këtë klub ekskluziv.

Microsoft parashikon një investim rekord prej 30 miliardë dollarësh në kapitale gjatë tremujorit të parë fiskal, për të fuqizuar ambiciet e saj në fushën e inteligjencës artificiale. Të dhënat pozitive nga shitjet në shërbimin e saj cloud Azure, të publikuara të mërkurën, kanë forcuar më tej optimizmin e tregjeve. Analistët e Wall Street gjithashtu theksuan se chatbot-i Copilot, i ndërtuar me teknologjinë AI, ka ndikuar ndjeshëm në rritjen e përdorimit të paketës Microsoft 365 në bizneset enterprise. Në krahasim me gjigantët e tjerë të teknologjisë, si Nvidia dhe Apple, rruga e Microsoft drejt vlerësimit prej 3 trilionë dollarësh ka qenë më e matur. Nvidia, si lider i inteligjencës artificiale, ka trefishuar vlerën e saj brenda një viti, duke kaluar kufirin prej 4 trilionë dollarësh që më 9 korrik. Apple, ndërkohë, ka një vlerë aktuale prej 3.12 trilionë dollarësh.

Rritja e aksioneve të Microsoft është ndihmuar edhe nga zhvillimet pozitive në bisedimet tregtare mes SHBA-së dhe partnerëve të saj, përpara afatit të 1 gushtit të vendosur nga presidenti Donald Trump për tarifat doganore, duke shtyrë treguesit kryesorë si S&P 500 dhe Nasdaq drejt niveleve rekord.

Microsoft, kompania e dytë më e madhe në SHBA, është rritur me gati 50% që nga nivelet e ulëta të prillit 2025, kur tregjet globale u tronditën nga ofensiva tarifore e Trump. Bastet miliardëshe të kompanisë për partneritetin me OpenAI po japin tashmë fryte, duke fuqizuar paketën Office dhe ofertat cloud të Azure me teknologjitë më të fundit të AI-së, dhe duke dyfishuar vlerën e aksioneve që prej prezantimit të ChatGPT në fund të vitit 2022. Falë aksesit ekskluziv në modelet e OpenAI, Microsoft ka marrë një pozicion drejtues në garën e inteligjencës artificiale gjenerative, duke e fuqizuar në mënyrë të jashtëzakonshme biznesin Azure, tashmë burimi kryesor i të ardhurave për kompaninë, dhe duke konsoliduar pozicionin e saj lider në krahasim me Google Cloud dhe Amazon Web Services. Besimi në rritje i Wall Street ndaj Microsoft vjen pas rezultateve rekord në të ardhura tremujor pas tremujori që nga shtatori 2022.

Rritjes së aksioneve i ka kontribuar gjithashtu vendosmëria e kompanisë për të optimizuar kostot përmes shkurtimit të stafit dhe rritjes së investimeve në AI, duke synuar të forcojë epërsinë e saj, teksa kompanitë në mbarë botën po garojnë për të përfituar nga kjo teknologji. Edhe pse përballë pasigurive nga tarifat e reja amerikane, fitimet e forta të Microsoft tregojnë se financat e kompanisë nuk janë prekur ende nga këto zhvillime. Megjithatë, përkundër rritjes së saj të vrullshme, Microsoft ka ndjekur një strategji të qartë të ristrukturimit të brendshëm, përfshirë reduktimin e fuqisë punëtore. Në fillim të këtij muaji, kompania njoftoi se do të shkarkojë rreth 9,000 punonjës, rreth 4% e totalit të stafit të saj, shkurtesa më e madhe që nga viti 2023. Këto largime vijnë pas 6,000 vendesh të reduktuara në maj.

Një zëdhënës i kompanisë theksoi se këto shkurtesa janë pjesërisht reflektim i teknologjive të reja që kanë rritur ndjeshëm produktivitetin e punonjësve. Edhe pse AI nuk u përmend drejtpërdrejt, shkurtimet përkojnë me momentin kur gjigantët e Silicon Valley po zbatojnë në praktikë teknologjitë që ata vetë po zhvillojnë. CEO i Microsoft, Satya Nadella, deklaroi më herët këtë vit se 20% deri në 30% e kodit të kompanisë tashmë po gjenerohet nga AI, ndërkohë që kompania vazhdon të investojë miliarda në ndërtimin e infrastrukturës së nevojshme për AI.