Dy punonjës të Microsoft janë pushuar nga puna pasi morën pjesë në një protestë në zyrën e presidentit të kompanisë, Brad Smith, kundër lidhjeve të Microsoft me ushtrinë izraelite. Policia arrestoi gjithsej 7 persona pasi ata pushtuan zyrën, ndërsa grupi protestues No Azure for Apartheid konfirmoi se mes të arrestuarve kishte punonjës aktualë dhe ish-punonjës të kompanisë.
Microsoft tha se pushimet nga puna u bënë për shkelje të rënda të politikave dhe kodit të sjelljes së kompanisë. Në një transmetim “live” në Twitch, protestuesit u panë të mbledhur teksa policia ndërhynte, ndërsa një grup tjetër qëndronte jashtë zyrës. Më parë, të njëjtët aktivistë kishin ndërprerë një fjalim të CEO-së Satya Nadella dhe festën e 50-vjetorit të kompanisë.
Arsyeja kryesore e protestës lidhet me raportet se ushtria izraelite po përdor platformën cloud të Microsoft, Azure, për ruajtjen e të dhënave të mbledhura nga survejimi masiv i palestinezëve në Gaza dhe Bregun Perëndimor. Microsoft ka angazhuar një firmë ligjore të jashtme për të hetuar akuzat dhe ka theksuar se termat e shërbimit të saj ndalojnë një përdorim të tillë.
Lexo edhe: Microsoft bëhet kompania e radhës që kap vlerën prej 4 trilionë dollarësh
Grupi No Azure for Apartheid kërkon që Microsoft të ndërpresë çdo bashkëpunim me Izraelin dhe të japë dëmshpërblime për palestinezët. Pas arrestimeve, Brad Smith tha se kompania është e vendosur të respektojë parimet e të drejtave të njeriut dhe kushtet e kontratës me klientët në të gjithë botën, duke theksuar se kjo është mënyra më e mirë për të vepruar në situata të tilla./Euronews.com
