Tirana në qendër të inovacionit: Future2Tech 2025 mbledh liderët e teknologjisë

Kryeqyteti shqiptar do të shndërrohet në epiqendrën e inovacionit këtë vjeshtë. Më 2 dhe 3 tetor, në Pallatin e Kongreseve zhvillohet edicioni i tretë i panairit ndërkombëtar Future2Tech 2025, një ngjarje që pritet të mbledhë mbi 100 ekspozues dhe më shumë se 5,000 vizitorë. Partner mediatik i aktivitetit do të jetë edhe Technews.al, duke e sjellë atmosferën e eventit edhe më pranë publikut.

Gjatë dy ditëve të panairit, pjesëmarrësit do të njihen nga afër me risitë më të fundit në inteligjencën artificiale, robotikë, fintech, siguri kibernetike dhe arsim digjital. Startup-et do të kenë një hapësirë të dedikuar për të prezantuar idetë e tyre dhe për të tërhequr vëmendjen e investitorëve vendas e ndërkombëtarë.

Një ndër pikat kulmore të këtij edicioni janë zonat interaktive, ku vizitorët mund të testojnë prototipa dhe aplikacione praktike të teknologjive më të reja. Përveç ekspozitës, do të zhvillohen mbi 15 panele e konferenca me ekspertë nga Shqipëria dhe bota, të cilët do të diskutojnë mbi sfidat dhe trendet e transformimit digjital.

Lexo edhe: Future2Tech 2025: Ftesë për bizneset dhe profesionistët që çojnë teknologjinë përpara

Future2Tech shihet si një urë lidhëse mes sektorit privat, institucioneve arsimore dhe politikëbërësve. Për startup-et shqiptare dhe rajonale, ky panair është një mundësi e artë për të hyrë në tregje të reja dhe për të bërë hapin e radhës në një skenë gjithnjë e më konkurruese globale.