Më 2 dhe 3 tetor, Pallati i Kongreseve në Tiranë do të mirëpresë edicionin e tretë të Future2Tech 2025, panairi ndërkombëtar i teknologjisë që pritet të mbledhë mbi 100 ekspozues dhe mijëra vizitorë nga Shqipëria, rajoni dhe më gjerë. Për dy ditë me radhë, kryeqyteti do të kthehet në skenën kryesore të inovacionit, ku liderë të industrisë, startup-e, investitorë dhe institucione arsimore do të prezantojnë risitë që po formësojnë të ardhmen digjitale.
Lexo edhe: Tirana në qendër të inovacionit: Future2Tech 2025 mbledh liderët e teknologjisë
Panairi do të ofrojë panele, demonstrime, prezantime dhe zona interaktive ku vizitorët mund të provojnë nga afër teknologjitë më të fundit në inteligjencë artificiale, robotikë, siguri kibernetike, fintech dhe arsim digjital. Për të apasionuarit pas teknologjisë, ky është eventi i vitit që nuk duhet humbur – një mundësi unike për të mësuar, për të eksploruar risi dhe për të krijuar lidhje të reja profesionale.
Një rol të rëndësishëm në këtë event e ka Vodafone Albania, e cila mbështet panairin si partner kryesor. Vodafone ka vite që udhëheq inovacionin në fushën e telekomunikacionit dhe transformimit digjital në Shqipëri, duke sjellë shërbime dhe platforma të reja që ndikojnë drejtpërdrejt në zhvillimin e ekonomisë digjitale dhe në jetën e përditshme të qytetarëve.
Ndërkohë, një nga pjesëmarrësit më të spikatur të këtij viti është Etronic, kompani e specializuar në sisteme të avancuara rrjeti dhe komunikimi. Me risitë që do të prezantojë në Future2Tech 2025, Etronic do të sjellë zgjidhje që fokusohen tek performanca, siguria dhe fleksibiliteti i rrjeteve moderne, duke u shndërruar në një pikë reference për profesionistët dhe bizneset që kërkojnë të adoptojnë teknologjitë më të fundit.
