Alarm në rrjet: Deepfake me fytyrën e Ilir Paços përdoret për mashtrime financiare, denoncon Erion Demiri

Një video mashtruese po qarkullon në rrjetet sociale duke synuar qytetarët shqiptarë, me premtimin absurd se kushdo që shkarkon një aplikacion i quajtu ‘Chicco Win’ dhe regjistrohet kundrejt 20 eurove do të marrë 7,000 euro nga Elon Musk.

Videoja shfaq prezantuesin e lajmeve në Top Channel, Ilir Paço, sikur po jep këtë informacion si lajm zyrtar. Por në fakt, bëhet fjalë për një deepfake – një video e manipuluar me inteligjencë artificiale për të mashtruar publikun.

Lexo edhe: Italia miraton ligje të guximshme për inteligjencën artificiale: dënime të rënda për deepfakes

Eksperti i IT, Erion Demiri, ka denoncuar publikisht këtë rast, duke paralajmëruar qytetarët të mos bien pre e skemës. “Meqënëse popullata shqipfolëse po targetohet specifikisht këto kohët e fundit (gjë që e kemi diskutuar edhe në media), vendosa ta postoj këtë video me shpresën e rritjes së ndërgjegjësimit!” – shkruan Demiri.

Sipas tij, këto video janë krijuar posaçërisht për audiencën shqiptare, duke përdorur fytyra publike për të fituar besimin e qytetarëve dhe për të vjedhur të dhënat e tyre personale apo financiare. Mungesa e informimit mbi deepfake-et po e bën publikun më të cenueshëm ndaj këtij lloj mashtrimi.

Ekspertët këshillojnë qytetarët të jenë të kujdesshëm me çdo reklamë që premton fitime të menjëhershme dhe të mos kryejnë pagesa në platforma të pasigurta. Autoritetet ligjzbatuese pritet të hetojnë këtë rast, i cili është vetëm një nga shumë skemat mashtruese që po përhapen në rajon përmes rrjeteve sociale.