Getty Images, një nga kompanitë më të njohura të fotografisë në botë, ka paraqitur kërkesë për mbrojtje nga falimentimi në SHBA, duke nisur një proces ristrukturimi financiar për të ulur borxhet dhe për të siguruar investime të reja.
Kompania po përballet me konkurrencën në rritje të platformave të inteligjencës artificiale, të cilat mund të gjenerojnë imazhe brenda sekondash dhe me kosto shumë më të ulët. Megjithatë, problemet financiare të Getty Images lidhen edhe me borxhet e mëdha dhe detyrimet ligjore.
Situata u përkeqësua pas dështimit të marrëveshjes prej 3.7 miliardë dollarësh për bashkimin me Shutterstock, e cila u ndërpre për shkak të pengesave rregullatore.
Për të shpëtuar biznesin, Getty Images ka siguruar angazhime për investime të reja deri në 533 milionë dollarë, nga familja Getty dhe Koch Equity Development. Plani synon uljen e borxheve dhe kthimin e kompanisë në pronësi private.
Lexo edhe: Artistët po fshijnë veprat nga rrjetet sociale: AI po riprodhon artin e tyre pa leje dhe pa shpërblim
Falimentimi nuk do të thotë mbyllje e Getty Images. Kompania ka njoftuar se do të vazhdojë aktivitetin normal gjatë ristrukturimit, pa ndërprerë shërbimet për klientët, fotografët dhe partnerët e saj.
Rasti i Getty Images ngre një pyetje të rëndësishme për të ardhmen e industrisë krijuese: si do të mbijetojnë bizneset tradicionale të fotografisë në një treg ku inteligjenca artificiale mund të prodhojë imazhe me një klikim?
