Twitter mund të jetë duke u rikthyer, të paktën në emër dhe pamje. Startup-i amerikan Operation Bluebird, ku bën pjesë edhe ish-juristi i Twitter Stephen Coates, ka lançuar platformën e re Twitter.now. Rrjeti social ngjan me Twitter-in e dikurshëm, përdor sërish identitetin e “zogut blu” dhe vjen si një sfidë e drejtpërdrejtë ndaj X të Elon Musk.
Coates e prezantoi rikthimin me mesazhin provokues “Get over your X. The bird is back”, por theksoi se qëllimi nuk është thjesht rikrijimi i Twitter-it të vjetër. Twitter.now synon t’u japë përdoruesve më shumë kontroll mbi atë që shfaqet në feed, duke u mbështetur në parimin “liri e fjalës, jo liri e shtrirjes”. Platforma po teston gjithashtu VERA, një sistem të bazuar në inteligjencë artificiale që kontrollon pretendimet dhe u cakton postimeve sinjale besueshmërie.
Por kush e zotëron emrin “Twitter”?
Pikërisht këtu nis beteja me Elon Musk. Operation Bluebird pretendon se X Corp. hoqi dorë nga të drejtat mbi markat “Twitter”, “Tweet” dhe simbolin e zogut pasi Musk e riemërtoi platformën në X. Kompania kërkoi anulimin e disa markave tregtare, ndërsa X reagoi duke e paditur startup-in. Në një seancë në prill 2026, një gjykatës federal dha sinjale paraprake se X mund të ketë hequr dorë nga disa prej këtyre të drejtave, por çështja juridike nuk është zgjidhur përfundimisht.
20 dollarë për t’u bërë ndër përdoruesit e parë
Twitter.now ndodhet ende në fazën e hershme të testimit. Përdoruesit mund të paguajnë 20 dollarë për akses të hershëm, duke siguruar edhe mundësinë për të rezervuar emra të preferuar përdoruesish. Platforma premton më shumë transparencë dhe kontroll personal mbi përmbajtjen, në vend që një algoritëm i vetëm të vendosë se çfarë duhet të shohë secili.
Operation Bluebird e paraqet projektin si një përpjekje për të rindërtuar një “shesh publik” online të bazuar te besimi, transparenca dhe zgjedhja e përdoruesit. Por suksesi i Twitter.now do të varet jo vetëm nga nostalgjia për zogun blu, por edhe nga rezultati i betejës ligjore me X dhe aftësia e platformës për të tërhequr një numër të madh përdoruesish. Për momentin, Twitter-i i ri ka vetëm qindra përdorues dhe është ende shumë larg përmasave të rrjetit që dikur ndryshoi mënyrën se si bota komunikonte online.
