Pajisjet Samsung, së shpejti mund të kenë Bing si motorin e tyre bazë të kërkimit, për shkak të integrimit të shpejtë me veçoritë e inteligjencës artificiale ChatGPT. Ky veprim do të sillte një shkëputje nga Google, i cili ka qenë motori bazë i kërkimit për pajisjet Samsung për 12 vitet e fundit.
Ky ndryshim nënkupton rritjen e mbështetjes për kompanitë që janë përpara në garën e AI. Bing ka prezantuar veçoritë e reja të AI për përdoruesit e platformës, ndërsa vazhdon të shtyjë përpara projekte të reja, siç është gjeneratori i imazhit të Bing.
Ndërkohë, Google pritet të humbasë 3 miliardë dollarë nga të ardhurat vjetore prej 162 miliardë dollarësh nëse zëvendësohet në pajisjet Samsung. Google ka hasur pengesa të shumta në garën e inteligjencës artificiale, duke pasur një humbje prej 100 miliardë dollarësh në fillim të shkurtit, kur chatbot-i i tij, Bard, grumbulloi informacione të pasakta në videon e tij promovuese. Analisti i Atlantic Equities, James Cordwell, deklaroi se investitorët shqetësohen se Google është bërë një monopolist “dembel” në përshtatjen me platformat AI, dhe se zhvillimet e dy muajve të fundit kanë shërbyer si një shtysë e re për të sjellë përmirësime.
Sipas disa burimeve mediatike, Google se po punon për krijimin e një motori të ri kërkimi të fuqizuar nga AI, i cili duket se kundërshton drejtpërdrejt komentet e CEO të Alphabet, Sundar Pichai, i cili tha se nuk donte të nxitonte në lëshimin e produkteve të AI. Së fundmi, në një intervistë, Pichai tha se ai e ka menduar Inteligjencën Artificiale si teknologjinë më të rëndësishme mbi të cilën po punon njerëzimi, duke e krahasuar me të gjithë shpikjet e mëparshme si zjarri, apo ndriçimi.
Një zëdhënës i Google tha për New York Times se kompania është gjithmonë duke përmirësuar motorin e saj të kërkimit për të bindur përdoruesit që të vazhdojnë të kthehen në platformë, por sqaroi se prodhuesit e telefonave Android mund të kalojnë në teknologji të tjera që mund të ndikojnë pozitivisht në përvojën e klientit. Për më tepër, Google rrezikon të humbasë 20 miliardë dollarë shtesë nëse Apple vendos të mos rinovojë kontratën e saj për vitet e ardhshme.
