Gjysma e ruterëve të përdorur përmbajnë informacion konfidencial kur nxirren nga përdorimi

Një studim i fundit nga ESET ka zbuluar se mbi gjysma e ruterëve të përdorura, që kompanitë përdorin për qëllime testimi, përmbajnë informacione të rëndësishme në lidhje me rrjetin, kredencialet dhe të dhënat konfidenciale nga organizatat, në momentin që këto të fundit i nxjerrin nga përdorimi.

Studiuesit blenë 18 rutera të përdorur nga Cisco, Fortinet dhe Juniper Networks, dhe prej tyre, nëntë ishin plotësisht të aksesueshëm dhe ashtu siç i kishin lënë pronarët e mëparshëm të tyre, dhe vetëm pesë ishin fshirë në mënyrën e duhur. Katër pajisjet e mbetura përmbanin probleme të tjera, të cilat e bënin të pamundur aksesimin.

Të nëntë pajisjet e pambrojtura përmbanin kredenciale për VPN-ët e organizatave, kredenciale për shërbimet e komunikimit të rrjetit, ose fjalëkalime konfidenciale. Për më tepër, tetë nga nëntë pajisjet e pambrojtura përfshinin fjalëkalime, dhe informacione se si ruteri lidhej me aplikacione specifike të përdorura nga pronari i mëparshëm.

Katër pajisje përmbanin kredencialet për t’u lidhur me rrjetet e organizatave të tjera, ndërsa tre përmbanin informacion se si një entitet mund të lidhej si palë e tretë me rrjetin e pronarit të mëparshëm. Ruterët mund të kenë një vlerë të lartë për kriminelët kibernetikë, dhe hakëruesit e mbështetur nga shteti, të cilët mund të përdorin informacionin e përfshirë në to për të nisur fushata kërcënimi kibernetik ose spiunazhi. ESET zgjodhi të publikojë gjetjet për të rritur ndërgjegjësimin për problemin.

Meqenëse pajisjet janë me çmime më të ulta në treg, mund të jetë e mundshme që kriminelët kibernetikë të investojnë në blerjen e pajisjeve të përdorura, për t’i minuar ato për informacion dhe akses në rrjet, dhe më pas të përdorin ose rishesin informacionin e marrë. Studiuesit e ESET besojnë se shumë organizata mund të përfitojnë nga enkriptimi dhe veçoritë e tjera të sigurisë kibernetike të ofruara tashmë nga ruterët e zakonshëm. Kjo gjë mund të ulë rrezikshmërinë nëse routerët e përdorur bien në dorë të hakerusëve kibernetikë.