Një kërkim i ri ka arritur në konkluzionin se përdorimi i smartphone-ve dhe mediave sociale tek adoleshentët lidhet me një rritje të problemeve të shëndetit mendor si depresioni, ankthi dhe vetmia.
Psikologia e fushës së tendencave gjeneracionale, Jean Twenge, kreu një studim të matjes së indikatorëve të shëndetit mendor për pesë grupmosha, nga gjenerata e heshtur deri te gjenerata Z, për të mbështetur këtë hipotezë.
Përdorimi i mediave sociale është rritur që nga viti 2012, në të njëjtën kohë kur adoleshentët kanë filluar të shpenzojnë më pak kohë duke u shoqëruar personalisht me miqtë e tyre. E gjithë kjo kohë para ekranit ka shkurtuar kohën e gjumit të shumë fëmijëve, pasi midis viteve 2010 dhe 2021, përqindja e nxënësve të klasave të 10-ta dhe të 12-ta që flinin shtatë ose më pak orë çdo natë, u rrit nga një e treta, në gati gjysmën e të gjithë fëmijëve të këtyre grupmoshave.
Twenge thotë se ky është një problem, pasi fëmijët në atë grupmoshë supozohet të flenë nëntë orë në ditë. Në të gjithë indikatorët e marrë parasysh që nga viti 2010, ankthi, depresioni dhe vetmia kanë pësuar një rritje.
Përdorimi i shpeshtë i smartphone-ve, gjë e cila ka lejuar angazhim pothuajse të pandërprerë me aplikacionet e mediave sociale, mund të jetë arsyeja pse kjo po ndodh.
Shkencëtarët kanë publikuar shumë studime në dekadën e fundit, duke u përpjekur të përgjigjen nëse mediat sociale në të vërtetë shkaktojnë probleme të shëndetit mendor tek adoleshentët, gjë që ngjalli debat të fortë mes shkencëtarëve dhe mediave. Megjithatë, rezultatet e studimit të Twenge kanë dhënë prova për këtë hipotezë.
