Netflix ka humbur më shumë se një milion përdorues në Spanjë në tre muajt e parë të vitit 2023, sipas grupit të kërkimit të tregut Kantar, një shenjë se tentativa e gjigantit të filmave dhe serialeve për eleminimin e shpërndajes së profileve mund të dështojë.
Në fillim të shkurtit, Spanja u bë një nga tregjet e para që Netflix prezantoi një tarifë mujore për përdoruesit që ndajnë detajet e tyre të profilit me njerëz të tjerë, dhe masat teknike për të zbuluar një ndarje të tillë. Kjo lëvizje solli një rënie të përdoruesve prej më shumë se një milion, dy të tretat e të cilëve përdornin fjalëkalimin e dikujt tjetër, sipas hulumtimit të Kantar.
“Është e qartë se kjo rënie e madhe është për shkak të masave të Netflix,” tha Dominic Sunnebo, Drejtor i Analiza Globale të Kantar, duke shtuar se humbja e një milion përdoruesve, edhe nëse shumica nuk do të ishin abonentë me pagesë, do të ishte një goditje për Netflix përsa i përket rekomandimeve për filmat dhe serialet që ofron.
Anullimet e abonimeve në tremujorin e parë u trefishuan në krahasim me periudhën e mëparshme, sipas hulumtimit të Kantar. Nga të gjithë abonentët e mbetur të Netflix në Spanjë, një e dhjeta thanë se planifikonin të çregjistroheshin në tremujorin e dytë.
“Ne shohim një rritje të anullimeve në çdo treg, kur shpallim masat për parandalimin e ndarjes së profileve,” tha Netflix në publikimin e të dhënave financiare të tremujorit të parë më 18 prill, duke pritur që rënia të jetë momentale përpara se përdoruesit që nuk paguanin, të fillojnë të regjistrohen për llogaritë e tyre. “Në Kanada, që ne besojmë se është një parashikues i besueshëm për SHBA-në, baza jonë e anëtarësimit me pagesë aktualisht është më e madhe se përpara fillimit të masave, dhe rritja e të ardhurave është përshpejtuar,” tha Netflix.
Në nivel global, më shumë se 100 milionë njerëz përdorin një llogari për të cilën nuk paguajnë, sipas Netflix. Kompania nuk e shpjegon këtë shifër sipas shteteve.
Investimi i Netflix në filmat dhe serialet në gjuhën spanjolle duket se po shpërblehet. Në tre muajt e parë të 2023, dy nga pesë seritë më të ndjekura në Spanjë ishin të disponueshme në Netflix, sipas Kantar. Kompania hapi qendrën e saj të parë europiane të prodhimit në Madrid në vitin 2019, një objekt që ishte dyfishuar në madhësi gjatë viteve të fundit.
