Microsoft po përballet me një ndërprerje të madhe globale të shërbimeve, duke lënë mijëra përdorues pa akses në Outlook, Teams dhe Copilot. Problemet nisën të enjten, më 12 nëntor, rreth orës 18:30, dhe po vazhdojnë edhe gjatë së premtes, 13 nëntor.
Outlook, një nga shërbimet më të përdorura të postës elektronike në botë, me mbi 430 milionë përdorues, është ndër më të prekurit. Shumë përdorues nuk arrijnë të hapin emailin, ndërsa të tjerëve u shfaqet mesazhi “Something went wrong”. Edhe ata që arrijnë të hyjnë në llogaritë e tyre raportojnë se mesazhet e fundit nuk shfaqen.
Sipas raportimeve, numri i ankesave arriti një kulm prej rreth 130 mijë të enjten në mbrëmje. Problemet nuk kufizohen vetëm te Outlook, por kanë prekur edhe platformën e komunikimit profesional Teams, asistentin e inteligjencës artificiale Copilot dhe shërbime të tjera të Microsoft 365.
We’re investigating reports of users experiencing issues accessing Exchange Online mailboxes through multiple connection methods in the Americas. More details can be found in the Microsoft 365 admin center under EX1550543.
— Microsoft 365 Status (@MSFT365Status) November 12, 2026
Microsoft ka pranuar se masat e ndërmarra për zgjidhjen e problemit nuk po japin rezultatet e pritshme.Kompania ka shpjeguar se disa serverë dolën papritur jashtë funksionit, duke mbingarkuar pjesën tjetër të infrastrukturës. Serverët problematikë janë rinisur, ndërsa ekipet teknike po monitorojnë situatën dhe po kërkojnë zgjidhje alternative.
Kompania ka raportuar shenjat e para të stabilizimit, por shërbimet nuk janë rikthyer ende plotësisht. Një nga prioritetet është ruajtja dhe dorëzimi i emaileve që janë dërguar gjatë ndërprerjes.
A bëhet fjalë për një sulm kibernetik? Microsoft ka deklaruar se aktualisht nuk ka asnjë tregues që problemet të jenë shkaktuar nga hakerët apo aktivitete të tjera keqdashëse.
Ndërkohë, ndërprerja ka shkaktuar edhe një valë memesh në rrjetet sociale. Shumë punonjës kanë reaguar me humor, duke bërë shaka se, pa Outlook dhe Teams, më në fund kanë një arsye për të mos punuar.
