Shërbimi i Shtetësisë dhe Emigracionit në SHBA (USCIS) ka akuzuar disa dhjetëra kompani të vogla teknologjike për bashkëpunim, për të rritur shanset e tyre për të fituar viza H-1B për punëtorët e huaj të kualifikuar.
USCIS zbuloi se një numër i vogël kompanish aplikojnë disa herë për të njëjtët aplikantë në llotari, për të rritur artificialisht shanset e tyre për të fituar një vizë. Kjo situatë ka kontribuar në rritjen e kërkesës për viza H-1B, në një rekord historik këtë vit. Përafërsisht 781,000 aplikime u bënë gjatë këtij viti për këtë llotari, për 85,000 kuota të disponueshme. Agjensia zbuloi se rreth 96,000 njerëz kanë aplikuar disa herë për viza, duke qenë përgjegjës rreth 408,000 aplikime. Qeveria nuk pranoi të zbulojë emrat kompanive në fjalë, por tha se ato iu referuan agjensive federale të zbatimit të ligjit për ndjekje penale të mundshme.
Megjithëse nuk është teknikisht e paligjshme që një punëtor i huaj të ketë disa kompani që të dorëzojnë aplikime për vizë në emër të tyre, kompanitë që paraqesin aplikime duhet të vërtetojnë se kanë një marrëdhënie reale pune me punonjësin në fjalë, nëse fitojnë vizë. USCIS deklaroi se do të skualifikojë aplikantët për viza, nëse ata kanë kryer mashtrime për të rritur shanset e tyre.
Viza H-1B ka qenë mënyra kryesore se si kompanitë mund të punësojnë punonjës të huaj me diploma universitare, veçanërisht studentë ndërkombëtarë të shkolluar në SHBA. Megjithëse është një vizë e përkohshme, ajo është një nga të paktat viza, dhe shpesh e vetmja, që lejon punonjësit e huaj të bëhen përfundimisht rezidentë dhe qytetarë të përhershëm të SHBA. Vitet e fundit, kërkesa për viza ka tejkaluar shumë ofertën.
