Katër senatorë amerikanë kanë propozuar një legjislacion për të rregulluar rrjetet sociale, në një përpjekje për të mbrojtur të miturit nga përmbajtjet e dëmshme.
Legjislacioni do të kërkojë që të gjithë fëmijët nën moshën 13 vjeç të ndalohen të përdorin mediat sociale, dhe për përdoruesit nën 18 vjeç do të kërkohet leje nga një kujdestar përpara se të krijojnë një llogari.
Për më tepër, kompanitë e mediave sociale do të pengohen të përdorin algoritme për t’ju rekomanduar përmbajtje përdoruesve nën 18 vjeç, dhe gjithashtu do t’u kërkohet të verifikojnë moshat e përdoruesve.
Senatorët besojnë se legjislacioni pasqyron shqetësimet e shumë prindërve, të shqetësuar se kompanitë e mediave sociale nuk po rregullohen mjaftueshëm. Megjithatë, projektligji përballet me sfida të rëndësishme, duke pasur parasysh se shumë përpjekje të mëparshme për të rregulluar industrinë e mediave sociale kanë dështuar.
Aktualisht, ka një numër projektligjesh në qarkullim, me qasje të ndryshme për rregullimin e përmbajtjes në internet. Këto përfshijnë zgjerimin e fushave të mbrojtjes së privatësisë së fëmijëve në internet, dhe zgjerimin e fuqisë së qeverisë për të rishikuar platformat në pronësi të huaj që konsiderohen kërcënime nga pikëpamja e sigurisë.
Kritikët e projektligjeve argumentojnë se ato rrezikojnë të kenë efektin e kundërt, dhe mund të pengojnë adoleshentët të kenë akses në burime të dobishme për çështje të ndjeshme. Nga ana tjetër, mbështetësit argumentojnë se mbrojtja e fëmijëve dhe adoleshentëve në internet është bërë një çështje që bashkon prindërit e të gjitha pikëpamjeve politike.
