Revolucion në fluturimet ajrore: Destinus premton fluturime 5 herë më të shpejta sesa shpejtësia e zërit

Destinus, një kompani e re Europiane me bazë në Zvicër, po synon të sjellë një epokë të re të udhëtimeve hipersonike. Kompania synon të zhvillojë avionë të bazuar në energji hidrogjeni, dhe me zero emetime karboni, që do të fluturojnë në mënyrë autonome. Sipas planit të Destinus, avionët hipersonikë do të arrijnë shpejtësi që do të jenë 5 herë më të shpejta sesa shpejtësia e zërit.

Kompania po zhvillon drone më të vegjël, përpara se të fillojë të komercializojë përpjekjet për të ndërtuar avionë të mëdhenj. Hidrogjeni është lënda djegëse e zgjedhur sepse është një burim energjie i pastër, i rinovueshëm, dhe gjithashtu është gjithnjë e më i lirë për t’u gjendur.

Qëllimi afatgjatë i kompanisë është që avionët hipersonikë të funksionojnë me energji të plotë hidrogjeni dhe zero emetime. Por, ndërkohë që prodhimi i hidrogjenit është ende në rritje, plani afatshkurtër i kompanisë është të pilotojë avionët testues me Jet A, karburant konvencional të aviacionit, dhe më pas të kalojë në hidrogjen kur të arrijë shpejtësinë e nevojshme për një fluturim të sigurtë.

Destinus shpreson të kryejë fluturimin e parë supersonik me energji hidrogjeni me prototipin e tij të ardhshëm, Destinus 3, në vitin 2024. Deri në vitin 2030, kompania shpreson të ketë filluar fluturimet me avionë të vegjël, që do mbajnë rreth 25 pasagjerë. Këto fluturime do të kenë disa kufizime për sa i përket rrezes së fluturimit, dhe do të jenë plotësisht fokusuar te klientët e klasit të biznesit. Deri në vitin 2040, vizioni i kompanisë është të ketë arritur zgjerimin e plotë, dhe përfshirjen e fluturimeve të shumta, duke përfshirë ato ekonomike.

Muajin e kaluar, Destinus bleu kompaninë holandeze OPRA, tani e quajtur Destinus Energy, e cila do të ndihmojë në zgjerimin e aftësive të kompanisë për të fluturuar nëpërmjet hidrogjen. Destinus siguroi grante në vlerë prej 26.7 milionë euro (29.4 milionë dollarë) nga qeveria spanjolle në prill 2023. Planet e saj varen nga tepricat e tregut të hidrogjenit, por ekspertët brenda dhe jashtë kompanisë kanë vlerësuar se çmimet e hidrogjenit do të vazhdojnë të jenë në rënie.