Një raport nga Instituti i Internetit i Oksfordit zbuloi se manipulimi i mediave sociale është në rritje, me më shumë qeveri dhe parti politike që përdorin në mënyrë të rregullt algoritmet e mediave sociale, automatizimin dhe të dhëna nga palë të treta për të manipuluar opinionin publik. Studiuesit zbuluan se propaganda kompjuterike dhe manipulimi i mediave sociale janë përhapur masivisht vitet e fundit. Përhapja e lajmeve të rreme dhe narrativave jo të sakta është bërë normale për aktorët politikë anembanë globit, falë shtrirjes globale të mediave sociale.
Raporti thekson se përdorimi i propagandës për të manipuluar qëndrimet e publikut nëpërmjet mediave sociale po bëhet një pjesë e zakonshme, dhe thelbësore e fushatës digjitale dhe diplomacisë publike. Studiuesit identifikuan 25 vende që punojnë me kompani private ose firma strategjike të komunikimit, të cilat ofrojnë si shërbim menaxhimin e opinionit publik në mediat sociale. Në disa raste, grupe studentore ose të rinjsh punësohen nga agjensitë qeveritare për të shpërndarë informacione jo të sakta.
Studiuesit zbuluan se 52 vende përdorën “dezinformimin dhe manipulimin e medias” për të mashtruar përdoruesit, dhe 47 vende përdorën llogari mediash sociale të sponsorizuara nga shteti për të sulmuar kundërshtarët ose aktivistët politikë. Kjo konfirmon perceptimin e përhapur në disa demokraci perëndimore se diskursi politik është bërë më pak i vërtetë dhe më virtual gjatë viteve të fundit. Kjo strategji arrihet duke pasur parasysh se taktikat që përforcojnë dezinformimin dhe synojnë sulmet ndaj kundërshtarëve politikë, po lulëzojnë me të vërtetë në mediat sociale.
Manipulimi i opinionit publik nëpërmjet mediave sociale mbetet një kërcënim për demokracinë, pasi propaganda bëhet një pjesë e përhapur e jetës së përditshme, paralajmëron profesor Philip Howard, Drejtor i Institutit të Internetit të Oksfordit. Megjithëse propaganda ka qenë gjithmonë pjesë e politikës, shtrirja e gjerë e këtyre fushatave ngre shqetësime të rëndësishme për demokracinë moderne.
Samantha Bradshaw, studiuesja dhe autorja kryesore e raportit, shtoi se mediat sociale dikur u shpallën si një forcë për liri dhe demokraci, por gjithnjë e më shumë janë vënë nën vëzhgim për rolin e tyre në përforcimin e dezinformimit, nxitjen e dhunës dhe uljen e besimit në mediat dhe institucionet demokratike. Bradshaw paralajmëron se teknologjitë e rrjeteve sociale – algoritmet, automatizimi dhe të dhënat nga palët e treta – ndryshojnë shumë shkallën, shtrirjen dhe saktësinë e mënyrës se si informacioni transmetohet në epokën digjitale.
Pavarësisht zbulimit të një rritjeje alarmante të numrit të aktorëve qeveritarë në të gjithë globin që po keqpërdorin platformat e fuqishme të mediave sociale, apo mjete të tjera teknologjike për të ndikuar në qëndrimet publike, apo për të tentuar të prishin zgjedhjet, Howard tha se studiuesit mbeten optimistë se media sociale mund të jetë “një forcë për mirë”, duke krijuar një hapësirë për lulëzimin e diskutimit publik dhe demokracisë. Një demokraci e fortë kërkon akses në informacion me cilësi të lartë dhe një aftësi për qytetarët që të mblidhen së bashku për të debatuar, diskutuar, menduar dhe analizuar.
Raporti arrin në përfundimin se është e domosdoshme që shtetet demokratike t’i mundësojnë qytetarëve të tyre edukimin dhe ndërgjegjësimin për t’i mundësuar atyre të mendojnë në mënyrë kritike për informacionet që u serviren atyre në internet. Sidoqoftë, rregullimi i platformave të mediave sociale, dhe përdorimi i mjeteve dhe teknikave të fuqishme për qëllime politike thjesht nuk është i arritshëm për momentin. Pra, nuk ka asnjë kontroll real në lidhje me manipulimin e votuesëve. Prandaj, qytetarët e shqetësuar këshillohen të praktikojnë një audit të mirë të privatësisë digjitale për të luftuar kundër përpjekjeve jodemokratike për të manipuluar opinionin publik.
