Disney+ ka humbur 4 milionë abonentë në tremujorin e parë të vitit 2023, duke shënuar rënien e dytë tremujore radhazi. Kjo pasoi rënien e saj të parë gjatë vitit të kaluar. Kompania i vlerësoi humbjet e saj në industrinë e transmetimit në vlerën 400 milionë dollarë, një rënie prej 26% nga viti në vit.
Disney+ e mbylli tremujorin me 157 milionë abonentë, më pak se parashikimi paraprak për të pasur 163 milionë abonentë. Disney+ Hotstar, versioni i shërbimit të ofruar në Indi dhe pjesë të Azisë Juglindore, pësoi një rënie prej 4.6 milionë abonentësh, duke sjellë një rënie për periudhën e dytë rradhazi. Disney humbi të drejtat e transmetimit në ndeshjet e Kampionatit Indian të Kriketit (IPL) vitin e kaluar, duke çuar në uljen e abonentëve për Disney+ Hotstar, në Indi.
Në SHBA dhe Kanada, Disney+ humbi rreth 300,000 abonentë, duke shkuar në 46 milionë përdorues aktivë. Ndërsa, nga ana tjetër, u shtuan gati 1 milionë përdorues në tregjet ndërkombëtare, duke përjashtuar Disney+ Hotstar. Hulu fitoi 200,000 abonentë gjatë kësaj periudhe, duke arritur në 48 milionë, ndërsa ESPN+ u rrit me 400,000, në 25 milionë.
Gjatë publikimit të të dhënave financiare, CEO i Disney, Bob Iger, njoftoi se Hulu do të prezantohej në Disney+ gjatë këtij viti, duke krijuar “argëtimin total në një aplikacion”. Për më tepër, CFO e Disney, Christine McCarthy, njoftoi se Disney është në procesin e rishikimit të përmbajtjes në shërbimet konsumatore, për t’u përshtatur me ndryshimet strategjike në qasjen e Disney për përmirësimin e përmbajtjes, dhe se do të heqë disa përmbajtje nga platformat e saj të transmetimit.
Sipas ekspertëve të platformave të dedikuara të transmetimit, kompani si Disney, Netflix, apo HBO do të përballen me sfida të rëndësishme në muajtë e ardhshëm, për shkak të ndryshimit të qasjes së konsumatorëve dhe drejtimit të tyre nga përmbajtjet në rrjetet sociale, si reels. Ndryshimi i strategjisë së Disney për të përmirësuar përmbajtjen, mund të jetë diçka që mund të ndryshojë shpërndarjen e përdoruesëve në këto platforma.
