Është publikuar një chatbot i ri, i quajtur CarynAI, i cili sillet si një partner ose partnere virtuale. Ky chatbot mundësohet nga teknologjia e inteligjencës artificiale, dhe regjistrimet e Caryn Marjorie në jetën reale. Caryn Marjorie është një influencuese 23-vjeçare, me 1.8 milionë ndjekës në Snapchat. CarynAI, i cili u publikua në maj si një test privat në aplikacionin Telegram, u mundëson përdoruesve të bisedojnë me një version chatbot të bazuar në zërin e Marjorie, me të cilin mund të diskutojnë çdo gjë, nga planet e tyre të ardhshme, deri te përmbajtjet e ngarkuara seksualisht. CarynAI kushton 1 dollarë në minutë për t’u përdorur, dhe tashmë ka gjeneruar 71,610 dollarë të ardhura nga përdoruesit e saj, të cilët janë kryesisht meshkuj.
Forever Voices, kompania e inteligjencës artificiale që ka krijuar CarynAI, ka krijuar chatbot-e të figurave të tjera publike, duke përfshirë Steve Jobs, Taylor Swift dhe Donald Trump, të cilat janë të disponueshme për biseda me pagesë në Telegram. Megjithatë, CarynAI është avatari i parë shoqërues romantik i kësaj platforme, duke premtuar të krijojë një lidhje emocionale me përdoruesit. John Meyer, CEO i Forever Voices, thotë se teknologjia është veçanërisht e rëndësishme për të rinjtë që kërkojnë marrëdhënie emocionale, por nuk kanë kohë të njohin njerëz.
Publikimi i CarynAI ka ngritur pyetje në lidhje me ndikimin e kësaj platforme në shoqëri, te përdoruesit, dhe te vetë Marjorie. Chatbot-i është përshkruar më shumë si Siri me një zë më të bukur, sesa e dashura virtuale e cila synon të “kurojë vetminë”. Ekspertët e etikës po bëjnë thirrje për diskutime, për të eksploruar konsideratat etike përpara se teknologjia të bëhet shumë e përhapur. Dr. Jason Borenstein, Drejtor i Programeve të Etikës në Georgia Tech, dhe Drejtor i Programit të Kërkimit Etik të Fondacionit Kombëtar të Shkencës, vë në pikëpyetje ndikimin e kësaj teknologjie në shoqëri.
Zhvilluesit nga Forever Voices përdorën 2000 orë të përmbajtjeve në YouTube të Marjorie, për të krijuar motorin e të folurit dhe personalitetit të CarynAI, dhe më pas vendosën API-në GPT-4 të OpenAI si sistem të Aai. Mesazhet e chatbot-it janë të enkriptuara, duke i bërë ato teorikisht të pa aksesueshme nga palët e treta. Zhvilluesit nuk kanë zbuluar ende ndonjë plan konkret për të menaxhuar përdorimin e tepërt të CarynAI, por ata mund të fillojnë të kufizojnë përdorimin nëse një individ kalon dy orë në ditë në këtë platformë.
