Skocia do të pilotojë rrjetin e parë të autobusëve pa shoferë në Mbretërinë e Bashkuar, javën e ardhshme. Megjithatë, drejtuesit e mjeteve do të jenë përsëri të pranishëm në timon, të gatshëm për të marrë kontrollin në rast emergjence. Ky shërbim novator, i operuar nga Stagecoach, synon të transportojë 10,000 pasagjerë në javë, përgjatë një rruge prej 22.5 kilometrash, duke përdorur pesë autobusë autonome. Ky do të jetë shërbimi i parë i automatizuar i autobusëve lokalë në botë, sipas operatorit.
Megjithëse autobusët do të udhëtojnë me shpejtësi të reduktuar, një shofer sigurie do të jetë në bord për të respektuar legjislacionin aktual të Mbretërisë së Bashkuar, i cili nuk lejon automjete plotësisht autonome. Gjatë modalitetit autonom, drejtuesit e mjeteve nuk kanë nevojë të prekin timonin, ndërsa një konduktor do të jetë përgjegjës për pasagjerët.
Sistemi i autobusit përfshin teknologji të avancuar për të identifikuar automjete të tjera, dhe për të parandaluar përplasjet. Kamerat optike dhe radarët do të skanojnë rrugën për të identifikuar këmbësorët, duke garantuar sigurinë. Për më tepër, sistemi i kontrollit është i pajisur me një motor inteligjence artificiale që merr informacion nga sensorë të ndryshëm në autobus. Kjo e lejon atë të përcaktojë vendndodhjen e saktë të autobusit dhe të llogarisë itinerarin më të sigurtë për të arritur destinacionin e tij.
Peter Stevens, Drejtor i Politikave të Stagecoach, theksoi se shërbimi i ri do të ofrojë siguri të shtuar, efikasitet të shtuar të karburantit dhe një përvojë të përmirësuar të pasagjerëve. Stevens theksoi aftësinë e sistemit për t’u siguruar shoferëve vizion 360 gradë, duke mundësuar përgjigje më të shpejta në krahasim me njerëzit, për sa i përket kohës së reagimit. Ndërsa autobusët mund të funksionojnë në mënyrë autonome, një shofer sigurie do të qëndrojë në sediljen e shoferit për të marrë kontrollin nëse është e nevojshme.
Për të siguruar përmirësim të vazhdueshëm, autobusët do të mësojnë vazhdimisht itinerarin, dhe do të mbledhin sasi të mëdha të dhënash çdo muaj. Ndërsa shërbimi përparon, sasia e udhëtimeve autonome do të rritet gradualisht. Një nga shoferët e autobuseve në këtë kompani, Callum Jones, shprehu entuziazmin për këtë revolucion teknologjik, duke theksuar se shërbimi i autobusit pa shofer përfaqëson diçka të re dhe emocionuese.
Ndërsa rrjeti i autobusëve pa shofer në Mbretërinë e Bashkuar është një moment i rëndësishëm, vendet e tjera gjithashtu kanë bërë përparime në këtë fushë. Koreja e Jugut kreu një eksperiment me autobus pa shofer në Seul, me qëllim përshtatjen e njerëzve me automjetet autonome. Në Europë, një autobus elektrik pa shofer filloi operimin në Malaga, ndërsa Singapori nisi një provë me autobus vetë-drejtues në fillim të këtij viti.
