Apple ka bërë një prezantim paraprak të veçorive të saj të ardhshme të aksesueshmërisë, të dizajnuara për të përmirësuar njohjen, vizionin, dëgjimin dhe lëvizshmërinë. Veçanërisht, gjigandi i teknologjisë ka prezantuar një veçori të re, të quajtur Personal Voice, i cili do të shërbejë për individët në rrezik për të humbur aftësinë e tyre të të folurit. Ky mjet inovativ i lejon përdoruesit të gjenerojnë një zë të sintetizuar, që pasqyron në mënyrë të ngjashme zërin e tyre, duke lehtësuar komunikimin me miqtë dhe familjen.
Krijimi i një zëri të tillë kërkon që përdoruesit të lexojnë me zë të lartë një sërë tekstesh, duke bërë një regjistrim prej 15 minutash në një iPhone ose iPad. I integruar me Live Speech, ky mjet u mundëson përdoruesve të shkruajnë fjalët që ata duan të thonë, dhe më pas këto fjalë do të shqiptohen nga programi Live Speech. Sipas Apple, të gjitha të dhënat e përdoruesit do të mbeten private dhe të sigurta.
Në një përpjekje për të mbështetur përdoruesit me aftësi të kufizuara njohëse, Apple po nxjerr gjithashtu Access Assistive, një veçori që thjeshton aplikacionet e saj kryesore. Ky funksion i thjeshton aplikacionet deri në veçoritë e tyre themelore, duke pakësuar ngarkesën njohëse për përdoruesit. Ndër këto modifikime të thjeshta përfshihet kombinimi i Phone dhe FaceTime, si dhe grafika të thjeshtuara të aplikacioneve të Mesazheve, Kamerës, Fotove dhe Muzikës. Këto versione do të shfaqin butona me kontrast të lartë, tekst të zmadhuar dhe mjete shtesë të aksesueshmërisë.
Zhvillimi i një “modaliteti të personalizuar të aksesueshmërisë” u vu re fillimisht në fund të vitit 2022, gjatë lëshimit të versionit beta të iOS 16.2. Apple ka treguar se këto veçori do të publikohen gjatë këtij viti, duke sugjeruar përfshirjen e tyre të mundshme në iOS 17.
Një modalitet i ri shikimi, nëpërmjet aplikacionit Magnifier, është një shtesë tjetër e rëndësishme, që synon të ndihmojë përdoruesit që janë të verbër ose me shikim të dobët. Kjo veçori i ndihmon përdoruesit të nder veprojnë me objekte fizike që kanë përmbajtje të mjaftueshme teksti. Për shembull, përdoruesit mund ta drejtojnë kamerën e iPhone ose iPad në një pajisje ku ka përmbajtje teksti, si për shembull një mikrovalë, dhe pajisja do e lexojë me zë tekstin, ndërsa përdoruesi lëviz gishtin mbi çdo numër ose cilësim. Kjo ilustron angazhimin e Apple për zhvillimin e teknologjisë gjithëpërfshirëse që përmirëson përvojën e përdoruesit për të gjithë.
