Në një marrëveshje historike, Samsung raportohet se ka rënë dakord të blejë panele TV OLED nga LG Display, një lëvizje që nënkupton një ndryshim të rëndësishëm në strategjinë e teknologjisë së prodhimit të televizorëve. Gjigandi koresano-jugor i teknologjisë planifikon të përfshijë në linjën e tij të produkteve panelet OLED 77 dhe 83 inç të LG-së, duke ndihmuar potencialisht që LG Display të bëhet fitimprurës. Kjo marrëveshje ndodh në një periudhë ku LG po përballet me një konkurrencë të ashpër në panelet LCD, nga prodhuesit kinezë.
Vendimi i Samsung për të blerë panele OLED nga LG, konkurrenti i saj prej kohësh, vjen pas vitesh spekulimesh për një marrëveshje të tillë. Është interesante se Samsung ndërpreu prodhimin e televizorëve OLED në 2015, duke përmendur kostot e larta të prodhimit, dhe një treg që nuk ishte mjaftueshëm tërheqës për televizorët e nivelit të lartë. Në vend të kësaj, kompania u fokusua në televizorët e saj të rangut të mesëm, por me cilësi më të ulët, të versioneve QLED. Megjithatë, televizorët OLED, që atëherë, kanë fituar një reputacion shumë pozitiv në tregun e televizorëve premium.
Samsung ka bërë një rikthim gjatë viteve të fundit në teknologjinë OLED, duke publikuar televizorin e tij të parë QD-OLED vitin e kaluar, dhe duke furnizuar panele OLED për televizorin e parë QD-OLED të Sony. Raportet sugjerojnë se LG Display do t’i dorëzojë Samsung-ut 2 milionë panele OLED në 2024, 3 milionë në 2025 dhe 5 milionë në 2026. Sipas kompanisë së kërkimit të tregut Omdia, LG kryeson në tregun e televizorëve OLED, duke mbajtur mbi 50% të tregut, e ndjekur nga Sony me 26% dhe Samsung me vetëm 6%.
Kjo marrëveshje arrin në një moment të favorshëm për të dyja kompanitë. LG Display raportoi së fundmi një ulje të kërkesës për televizorë, dhe shitje më të ulëta se sa pritej në panelet e televizorëve OLED, gjatë analizës së fundit financiare. Ndërkohë, Samsung Electronics është përballur me një rënie të kërkesës për disa nga pajisjet që ofron, dhe një reduktim të prodhimit të çipave të memories. Pavarësisht se udhëheq tregun global të televizorëve për 17 vjet rresht, Samsung përballet me konkurrencë të konsiderueshme nga rivalët kinezë, të cilët ofrojnë ekrane televizori më të lira. Kjo marrëveshje thekson riorganizimin strategjik të Samsung drejt tregut të televizorëve OLED.
