Google, platforma e cila ka miliarda llogari përdoruesish, publikoi të martën se po planifikon të fshijë llogaritë që kanë mbetur joaktive prej minimalisht dy vitesh. Vendimi është pjesë e përpjekjeve të vazhdueshme të gjigandit të teknologjisë për të forcuar masat e sigurisë për bazën e gjerë të përdoruesve, sipas një deklarate të kompanisë.
Duke filluar nga dhjetori i këtij viti, Google mund të fshijë një llogari, nëse nuk ka qenë aktive në asnjë nga shërbimet e saj për dy vjet, shkroi kompania në një postim në blog. Si pjesë e fshirjes së llogarisë, Google do të heqë gjithashtu përmbajtjen që përdoruesi ka ruajtur në Google Workspace, YouTube dhe Google Photos.
Google tha se do të dërgojë njoftime të shumta gjatë muajve që paraprijnë fshirjen e një llogarie, dhe do të fillojë pastrimin me ato llogari që janë krijuar dhe janë përdorur vetëm disa herë. Politika e re për të eleminuar llogaritë joaktive nuk do të ndikojë në llogaritë e biznesit, dhe ato të përdorura nga shkollat, tha Google.
Google po e merr këtë hap për të zbutur shqetësimet mbi sigurinë që lindin për shkak të llogarive joaktive, tha kompania. “Analiza jonë e brendshme tregon se llogaritë joaktive kanë të paktën 10 herë më pak gjasa për të konfiguruar verifikimin me 2 hapa, në krahasim me llogaritë e tjera. Kjo do të thotë se këto llogari janë shpesh të cënueshme, dhe pasi një llogari komprometohet, ajo mund të përdoret për çdo gjë, nga vjedhja e identitetit, te krijimi i përmbajtjeve të padëshiruara, apo edhe me qëllime të këqija” shkruan kompania në postimin në blog.
Google nuk publikoi informacion mbi çfarë planifikon të bëjë me emrat e përdoruesve pas fshirjes së llogarive joaktive. Lëvizja e kompanisë ndjek linjën e disa kompanive të tjera teknologjike, duke përfshirë Twitter. CEO i Twitter, Elon Musk, njoftoi së fundmi planet për të pastruar llogaritë joaktive, dhe për të ricikluar emrave të përdoruesve.
