Tinder, aplikacioni i njohur i njohjeve romantike, ka njoftuar një ndryshim të politikës për të parandaluar përdoruesit të transformojnë profilet e tyre në platforma për të fituar para. Kompania ka vendosur të heqë lidhjen me mediat e tjera sociale nga profilet publike, dhe të përditësojë udhëzimet e saj për të ndaluar ndarjen e emrave të përdoruesve, ose link-eve të profileve në faqet e tjera. Kjo lëvizje shihet si një goditje ndaj përdoruesve që përdorin profilet e tyre për përfitime komerciale, të tilla si drejtimi i shikuesëve drejt dyqaneve online, ose tregjeve të tjera nëpërmjet emrave të përdoruesve të Linktree.
Në një deklaratë publike, Tinder dekurajoi përdoruesit nga reklamimi, promovimi i profileve të tjera sociale për të fituar ndjekës, për të shitur produkte, për të mbledhur fonde, ose për fushata të ndryshme. Lëvizja është pjesë e një grupi më të gjerë udhëzimesh të rishikuara ndaj përdorusëve, dhe synon përforcimin e autenticitetit, respektit dhe përfshirjes.
Politikat e përditësuara përfshijnë kryesisht kërkesa për përdoruesit. Këto kërkesa lidhen me respektimin e kufijve, dhe ndalimin e shpërndarjes së bisedave private në publik. Duke përmendur se shumica e përdoruesve të Tinder janë midis moshës 18 dhe 25 vjeç, kompania thekson se rifreskimi i politikës synon të edukojë anëtarët rreth zakoneve të shëndetshme të takimeve, si në internet, ashtu edhe në jetën reale. Ehren Schlue, zv. Presidenti i Strategjisë së Anëtarëve në Tinder, theksoi rëndësinë e udhëzimit të të rinjve për të mbajtur parime morale, ndërsa ata nisin udhëtimin e tyre drejt romancës.
Mbetet e paqartë se si Tinder synon të fshijë link-et e mediave të tjera sociale nga bio-t e përdoruesëve, ose t’i parandalojë përdoruesit t’i ndajnë ato në bisedat private. Kompania inkurajon përdoruesit të raportojnë çdo shkelje të politikës së re, megjithëse zbatimi mund të jetë sfidues.
Politika e re mund të ndikojë gjithashtu në aftësinë e përdoruesve për të verifikuar vërtetësinë e të tjerëve. Ndërsa Tinder u kujton përdoruesve që të mos krijojnë profile të rremë, pa akses në mediat sociale të një personi, mund të bëhet më e vështirë të vërtetohet identiteti i tyre. Këto ndryshime sinjalizojnë angazhimin e Tinder për të ruajtur qëllimin origjinal të platformës, megjithëse efektiviteti dhe ndikimi i këtyre ndryshimeve në përvojën e përdoruesit mbeten për t’u parë.
