Ndërsa publikimi i ChatGPT ka frikësuar punonjësit mbi humbjen e vendeve të punës, shumë ekspertë kanë diskutuar mbi vlefshmërinë e këtyre shqetësimeve. Një sondazh sugjeron se ndërsa 62% e njerëzve parashikojnë se AI do të ndikojë ndjeshëm në punët që ata bëjnë gjatë 20 viteve të ardhshme, vetëm 28% parashikojnë një ndikim të drejtpërdrejtë në rolet e tyre. Shkolla e Biznesit të Harvardit ka diskutuar mbi mënyrën se si AI do të ripërcaktojë fuqinë punëtore dhe aftësitë thelbësore të punonjësve për të ardhmen.
Joseph Fuller, Profesor në Praktikat Menaxheriale, parashikon transformime të rëndësishme të fuqisë punëtore për shkak të teknologjive të AI. Ai argumenton se punëtorët me aftësi unike, të mbrojtur më parë nga automatizimi dhe globalizimi, do të përballen me ndryshime dramatike. Fillimisht, kompanitë do të jenë të kujdesshëm në adoptimin e teknologjive si ChatGPT, për shkak të nevojës për talent të specializuar, dhe sistemeve machine learning. Megjithatë, sapo kompanitë ta zotërojnë këtë teknologji, Fuller pret një rishikim të shpejtë të mënyrës së operimit të organizatave, duke gjykuar se numri i punonjësve administrativë do të ulet, por kompensohet nga rritja e numrit të të punësuarëve në fushat e inxhinierisë apo teknologjisë.
Ayelet Israeli, Profesor në fushën e Marketingut, pohon se, për momentin, AI shërben më mirë si një mjet shtesë për të ndihmuar ekspertët në punën e tyre, në mënyrë të ngjashme me mjetet e produktivitetit të Revolucionit Industrial. Mjetet e AI, si ChatGPT, janë ndërtuar për të krijuar përmbajtje, por rezultatet e tyre nuk duhet të merren gjithmonë të mirëqena si të sakta. Ato kërkojnë mbikëqyrje njerëzore për saktësinë dhe kontrollin e rezultateve, duke theksuar rëndësinë e roleve njerëzore në zbatimin e AI.
Për Iavor Bojinov, Profesor në fushën e Administrim Biznesit, potenciali i AI qëndron në aftësinë për të transformuar rolet, proceset dhe praktikat e punonjësve. Ai sugjeron që integrimi i AI në detyrat e përditshme i lejon profesionistët të përqendrohen në aktivitete me vlerë të lartë, duke rezultuar në diferenca të theksuara të fuqisë punëtore, midis atyre që përdorin AI dhe atyre që i rezistojnë asaj.
Edward McFowland III, Profesor në fushën e Teknologjisë, e krahason rolin e AI me atë të një makine llogaritëse, duke zhvendosur grupin e aftësive të nevojshme, por duke mos eliminuar punët. AI, sugjeron ai, është një ndihmë për vendimmarrjen njerëzore. Për përdorimin optimal të AI, ai propozon një ndryshim arsimor të ngjashëm me atë kur u prezantuan makinat llogaritëse, duke u fokusuar në mënyrën se si të strukturohen ndërveprimet me AI në mënyrë optimale, dhe njohjen e gabimeve në rezultatet e AI.
Tsedal Neeley, Profesoreshë në Praktikat Digjitale të Biznesit, thekson se revolucionet teknologjike historikisht kanë krijuar më shumë vende pune sesa vendet që kanë eleminuar. AI, sipas saj, rrit performancën njerëzore. Ajo citon shembuj të rolit të AI në tregtimin e aksioneve dhe programimin e Wall Street, duke rritur efektivitetin dhe produktivitetin. Këshilla e saj si për individët, ashtu edhe për organizatat, është që të fokusohen në përmirësimin e aftësive të punonjësve për të maksimizuar përfitimet e teknologjive të reja.
Sipas Harvard, AI ka të ngjarë të sjellë ndryshime të rëndësishme në vendet e punës, por nuk është një skenari që do të eleminojë vendet e punës. Theksi duhet të jetë në përshtatjen dhe përmirësimin e aftësive të punonjësve, duke e parë AI si një mjet ndihmues dhe jo si një kërcënim zëvendësues.
Artikuj të ngjashëm:
- Toyota Yaris Cross i qëndron besnik emrit të tij me një pamje të re energjike (FOTO)
- Amazona ka një logo të re të frymëzuar nga koordinatat e saj gjeografike (VIDEO)
- Google i shndërron kërkesat e inteligjencës artificiale në mjete automatizimi të Chrome
- “Shqipëria, terren i favorshëm për aktivitetet e Call Centerave”, eksperti i IT: Analizojnë profilet e individëve duke përdorur Inteligjencën Artificiale
- Ja sa kushton iPhone 17 Pro Max në vende të ndryshme të botës
