Në një botë ku avatarët dhe pseudonimet shpesh fshehin identitetin, ju mund të bisedoni me dikë që është më shumë sesa thjesht një lojtar tjetër, ose entuziast në Discord apo Reddit. Figura misterioze në internet mund të jetë shumë mirë një agjent që ruan gjurmët tuaja digjitale, një element i industrisë në rritje të “inteligjencës së kërcënimit”.
Firmat e mbikëqyrjes dhe sigurisë tani po krijojnë identitete të rreme në internet për të depërtuar në faqe private, si bisedat në Discord, forumet e Reddit, grupet në WhatsApp, dhe faqet e ndryshme në web. Inteligjenca që mbledhin këto agjentë ndihmon klientët e korporatave dhe qeveritë në monitorimin e kërcënimeve të mundshme, nga aktivistët politikë, deri te tregjet ilegale që merren me fjalëkalime të vjedhura dhe pronë intelektuale.
Në Konferencën RSA 2023, përfaqësues nga firmat e inteligjencës së kërcënimeve si ZeroFox, DarkOwl, Searchlight Cyber, Recorded Future, dhe CyberInt shpalosën disa nga strategjitë e tyre. Mënyra kryesore e funksionimit të tyre përfshin krijimin e identiteteve të besueshme në internet, dhe depërtimin në qarqe ekskluzive digjitale për të mbledhur informacion.
A.J. Nash, nënkryetar i inteligjencës në ZeroFox, konfirmoi aktivitetin e tyre brenda Discord, një aplikacion i njohur për biseda në grup midis përdoruesëve. Sipas Nash, operativët e tyre mund të futen lehtësisht në grupe më të mëdha, duke shmangur dyshimet. Taktika të ngjashme përdoren nga DarkOwl, i cili krijon identitete të fabrikuara për të fituar hyrjen në platformat private.
Personazhe të tillë, megjithatë, bëjnë më shumë sesa thjesht të përgjojnë. CyberInt, një firmë izraelite, vendos analistët e saj me identitete të rreme për të parashikuar dhe luftuar kërcënimet kibernetike.
Ndikimi i këtyre firmave nuk është i kufizuar në fushën e korporatave. Shumë prej tyre kanë krijuar marrëdhënie me agjensitë e zbatimit të ligjit, dhe ato qeveritare, me disa që aktualisht janë duke punuar me subjekte të tilla.
Interesi i qeverive për monitorimin e sferave private digjitale është në rritje. Shpërndarja dokumenteve të klasifikuara të Pentagonit në një bisedë private të grupit Discord, apo ajo e të dhënave të shtetasve Shqiptarë në Telegram, ka sjellë një interes të shtuar për mbikëqyrje të platformave të tilla. Administrata Biden, si përgjigje, po shqyrton mënyra për të monitoruar në mënyrë më efektive këto hapësira, për të parandaluar shpërndarjet e ardhshme të informacioneve konfidenciale.
Këshilltari i lartë i politikave të Demand Progress, Sean Vitka, paralajmëron kundër prirjes së mbikëqyrjes së jashtme, që çon në shkelje të mundshme të të drejtave civile. Megjithatë, përfaqësuesit e këtyre firmave pohojnë se nuk po shkelin liritë civile, dhe sigurojnë se veprimet e tyre verifikohen në mënyrë të vazhdueshme nga ekipet ligjore.
Ligjshmëria e praktikave të këtyre firmave mbetet e pasigurtë, për shkak të sekretit të industrisë. Rastet e mëparshme të abuzimit, të tilla si përpjekja nga një grup firmash të inteligjencës së kërcënimit për të ndërprerë rrjetin e hakuesëve LulzSec, dhe për të diskredituar gazetarin Glenn Greenwald, shkaktojnë shqetësim të mëtejshëm.
Me qeveritë, median, dhe akademinë që mbështet propozimet për rritjen e mbikëqyrjes, është e qartë se ky tension midis sigurisë dhe privatësisë do të vazhdojë të dominojë mjedisin digjital. Siç thekson Vitka, erozioni i mundshëm i besimit në internet mund të jetë një pasojë fatkeqe, dhe e paqëllimshme e këtyre përpjekjeve të vazhdueshme të mbikëqyrjes.
