Amazon ka hequr veçorinë e blerjes së zërave të personave publikë për Alexa, duke ndërprerë mbështetjen për zërat e famshëm të Samuel L. Jackson, Shaquille O’Neal apo Melissa McCarthy. Klientët nuk do të jenë më në gjendje të dëgjojnë në pajisjet e tyre zërat e personazheve të tyre të preferuar, ose të përdorin komandën “Hej [emri i famshëm]” për të marrë përgjigje në zërat e tyre.
Opsioni i zërave të personave publikë, i cili kushtonte 4,99 dollarë, i lejonte përdoruesit e Alexa të përfshiheshin në biseda, të bënin shaka, ose të dëgjonin histori nga personazhet e tyre të preferuar. Megjithatë, pavarësisht pëlqyeshmërisë që kishin përdoruesit, zërat e këtyre personazheve do të pushojnë së funksionuari në pajisjet Alexa.
“Pas tre vjetësh, ne po i largojmë zërat e figurave publike”, tha zëdhënësi i Amazon, Eric Sveum. Klientët që e kanë blerë tashmë funksionin mund të vazhdojnë ta përdorin atë për një kohë të kufizuar, dhe kanë të drejtë të kontaktojnë shërbimin e klientit për një rimbursim.
Në një njoftim publik, Amazon shpjegoi se zëri Alexa i Samuel L. Jackson nuk është më i disponueshëm për t’u blerë. Klientët që kanë blerë më parë përvojën mund të vazhdojnë ta përdorin këtë veçori për një periudhë të shkurtër kohe, duke thënë “Hej Samuel”. Përditësime të ngjashme u postuan për zërat e McCarthy dhe Shaq, të cilët janë të disponueshëm deri më 30 shtator 2023.
Arsyeja e vendimit të Amazon për të tërhequr funksionin e zërave të figurave publike është e paqartë. Disa media kanë raportuar se kjo gjë mund të sinjalizojë çështje më të gjera brenda departamentit Alexa të Amazon. Një raport i Wall Street Journal në nëntor zbuloi ekzaminimin rigoroz të sektorit Alexa, nga CEO i Amazon, Andy Jassy, pasi humbjet operative kanë arritur në 5 milionë dollarë në vitet e fundit. Në fillim të këtij viti, kompania largoi nga puna 18,000 punonjës, ku 2,000 nga këto shkurtime prekën departamentin përgjegjës për produktet Alexa dhe Echo, siç zbuloi shefi i pajisjeve të Amazon, Dave Limp.
Në vazhdën e rritjes së konkurrencës nga modelet e AI, si ChatGPT, një raport i fundit i Insider sugjeroi se Amazon mund të rikonfigurojë Alexa-n për ta bërë atë “më proaktive dhe biseduese” me modelin e saj të AI. Mbetet për t’u parë nëse ndërprerja e zërave të figurave publike vjen nga problematikat në këtë departament, apo është një çështje e kostove të shtuara të licencimit.
