Fuqia nga ajri: Kërkimi novator zhbllokon potencialin për energji të pastër nga lagështia

Në një zbulim novator, disa studiues kanë zbuluar se lagështia e kudogjendur në ajër mund të shfrytëzohet për të gjeneruar energji të pastër dhe të qëndrueshme. Ky burim i pa studiuar më parë i energjisë, ndryshe nga energjia diellore ose ajo e erës, është vazhdimisht i disponueshëm, dhe nuk kontribuon në ndotje, thotë një studim i publikuar së fundmi në Advanced Materials.

“Kjo është shumë emocionuese. Ne po hapim një derë të gjerë për grumbullimin e energjisë elektrike të pastër nga ajri”, tha Xiaomeng Liu, autori kryesor i punimit, dhe një student i diplomuar në Universitetin e Massachusetts-Amherst.

Studiuesit janë të bindur se pothuajse çdo material mund të shndërrohet në një pajisje që prodhon vazhdimisht elektricitet nga lagështia atmosferike. Ata shpjegojnë se ajri ka një vëllim të madh ngarkese elektrike.

Jun Yao, profesor i Inxhinierisë Elektrike dhe Kompjuterike në Universitetin e Masaçusets-Amherst, shtoi: “Mendoni për një re, e cila nuk është gjë tjetër veçse një masë pikash uji. Secila prej atyre pikave përmban një ngarkesë, dhe kur kushtet janë të përshtatshme, reja mund të prodhojë një rrufe – por ne nuk dimë se si të kapim në mënyrën e duhur energjinë elektrike nga rrufeja.”

Ai e përshkroi këtë inovacion si krijimi i një reje artificiale nga njeriu në shkallë të vogël, që prodhon në mënyrë të parashikueshme dhe të vazhdueshme energji elektrike. Në thelbin e kësaj reje artificiale qëndron një gjenerator me fuqi ajri ose “air-gen”, siç e quajnë Yao dhe kolegët e tij.

Studimi bazohet në studimet e mëparshme të kryera në vitin 2020, ku shkencëtarët propozuan se kjo teknologji e re mund të ketë implikime të rëndësishme për të ardhmen e energjisë së rinovueshme, ndryshimet klimatike, dhe të ardhmen e mjekësisë. Studimi i mëparshëm tregoi se energjia mund të merret nga lagështia, duke përdorur materiale që vijnë nga bakteret. Studimet e fundit, megjithatë, sugjerojnë se pothuajse çdo material, si silikoni ose druri, mund të përdoret për këtë qëllim. Pajisja e diskutuar në studim është e vogël, me një diametër më të vogël se 100 nanometra.

Për shkak se lagështia është e gjithëpranishme, makina krijuese e energjisë mund të funksionojë gjatë gjithë ditës, pavarësisht nga kushtet e motit. Ky gjenerim i vazhdueshëm i energjisë e veçon atë nga teknologjitë e energjisë së erës ose diellit që mbështeten shumë në kushte specifike. Ky studim hap një derë të gjerë për eksplorimin e gjerë të energjisë elektrike të qëndrueshme nga ajri, sipas autorëve.