Krerët e gjigantit të lojrave Sega, Haruki Satomi dhe Koichi Fukazawa, po konsiderojnë rritjen e çmimeve për video-lojërat e tyre të ardhshme. Rritja potenciale u diskutua gjatë një sesioni pyetjesh dhe përgjigjesh që pasoi konferencën e rezultateve financiare të Sega.
Për një kohë të gjatë, lojërat AAA janë shitur me pakicë për një çmim prej 59,99 dollarë. Megjithatë, gjatë vitit të kaluar, disa kompani i kanë rritur çmimet e tyre në 69,99 dollarë, duke përfshirë Sony, Take-Two, Activision Blizzard dhe Gearbox, veçanërisht për lojërat në konsolat e gjeneratës së re PlayStation 5 dhe Xbox Series X/S. Sega po mendon të ndjekë të njejtën strategji, duke pranuar gjithashtu dinamikën e tregut.
“Ne do të donim të rishikonim çmimet e lojërave tona, pasi kemi vënë re një dinamikë të ngjashme në të gjithë industrinë, duke mbajtur parasysh edhe kushtet e tregut”, thanë drejtuesit e Sega. Ata vunë në dukje se të ardhurat nga shërbimet e abonimit dhe marrëveshjet kontraktuale do të ndikojnë në çmimin përfundimtar të lojërave të ofruara nga Sega. Pyetja kryesore për shumë nga lojtarët është nëse do të ketë rritje për versionin e ri të lojës Sonic, i cili pritet të kushtojë rreth 60 dollarë.
Për të justifikuar këtë rritje të mundshme, Sega duhet të sigurojë që lojërat e tyre AAA të mbajnë një standard cilësie më të lartë se disa nga lojërat e tyre të fundit. Ndërkohë, Nintendo publikoi lojën e saj të fundit Zelda, “Tears of the Kingdom”, për 70 dollarë në SHBA.
Doug Bowser, kreu i Nintendo, sqaroi se kjo nuk do të thotë që të gjithë lojërat e ardhshme do të ndjekin të njëjtën strategji çmimi. Ndërsa industria e lojrave vazhdon të evoluojë, strategjia e çmimeve të lojërave kryesorë do të jenë një faktor i rëndësishëm për t’u analizuar.
