Rritja e energjisë së gjelbër: IEA parashikon rritje rekord të energjisë së rinovueshme gjatë krizës globale të energjisë

Sipas një raporti të ri nga Agjensia Ndërkombëtare e Energjisë (IEA), bota parashikohet të ketë një rritje të paprecedentë të kapacitetit të energjisë elektrike të rinovueshme deri në fund të këtij viti. Kjo rritje, e nxitur nga rritja e çmimeve të karburanteve dhe shqetësimet për sigurinë e energjisë, të përkeqësuara nga konflikti mes Rusisë dhe Ukrainës, nënkupton një lëvizje inkurajuese drejt burimeve më të gjelbra të energjisë, dhe një përgjigje ndaj rritjes së kostove të energjisë.

Raporti sugjeron se deri në vitin 2023, instalimet e energjisë diellore dhe asaj të erës në mbarë botën parashikohen të arrijnë deri në 440 gigavat, një rritje e rendësishme prej 30% nga viti i mëparshëm. Kjo e çon kapacitetin global të energjisë diellore në 4,500 GW, e cila është ekuivalente me fuqinë totale të prodhimit të centraleve të energjisë të Shteteve të Bashkuara dhe Kinës, së bashku.

“Energjitë e rinovueshme kanë dëshmuar të jenë jo vetëm më të pastra, por edhe një burim më i sigurt dhe më i përballueshëm i energjisë, gjatë krizës globale të energjisë”, tha Fatih Birol, drejtori ekzekutiv i IEA. Ai vuri në dukje se qeveritë po përshpejtojnë përpjekjet e tyre për të rritur burimet e rinovueshme të energjisë, me stimujt e fundit nga shumë qeveri, që tashmë kanë sjellë një rritje të konsiderueshme në adoptimin e burimeve të rinovueshme të energjisë.

Burimet fotovoltaike (PV) parashikohen të përbëjnë dy të tretat e rritjes së pritshme të kapacitetit të energjisë së rinovueshme këtë vit. IEA gjithashtu theksoi se ka një rritje të konsiderueshme në kapacitetin prodhues për komponentët PV, veçanërisht në Kinë.

Për më tepër, ndërtimi i parqeve që prodhojnë energjinë e erës pritet të rritet gjatë muajve të ardhshëm, pas një periudhe rritjeje relativisht të ngadaltë. Në kundërshtim me prodhimin diellor, zinxhirët e furnizimit për turbinat e erës nuk po zgjerohen me shpejtësi të mjaftueshme për të përmbushur kërkesën në rritje, paralajmëroi agjensia.

Birol nënvizoi gjithashtu rëndësinë e shtimit dhe modernizimit të rrjeteve të energjisë, për të akomoduar natyrën e veçantë të energjisë diellore dhe të erës. Kjo kërkon një ndryshim drastik në operacionet e ofruesve të energjisë, duke u larguar nga mbështetja në qymyrin, gazin ose centralet bërthamore.

Për sa i përket vendeve specifike, IEA parashikon që në disa vende europiane, duke përfshirë Spanjën, Gjermaninë dhe Irlandën, energjia e rinovueshme do të përbëjë mbi 40% të gjenerimit të përgjithshëm vjetor të energjisë elektrike deri në vitin 2024.

Dekarbonizimi i ekonomisë globale, dhe largimi nga lëndët djegëse është thelbësore për zbutjen e emetimeve të karbonit, të cilat janë kryesisht përgjegjëse për ngrohjen globale. Për të arritur objektivin e Marrëveshjes së Parisit për Klimën, për kufizimin e rritjes së temperaturës globale në 1.5 gradë Celsius, emetimet duhet të përgjysmohen deri në vitin 2030, dhe të arrijnë objektivin ‘zero neto’ deri në vitin 2050.

Në këtë drejtim, Agjensia Ndërkombëtare e Energjisë së Rinovueshme, një organizatë e pavarur, ka advokuar për një përshkallëzim të konsiderueshëm të investimeve drejt energjisë diellore dhe të erës. Një objektiv ndërkombëtar për përhapjen e energjisë së rinovueshme pritet të diskutohet në samitin e ardhshëm të OKB-së për klimën, në Dubai.