Në një përpjekje për të krijuar rregullore për botën e Inteligjencës Artificiale (AI), Shtetet e Bashkuara dhe Bashkimi Europian kanë deklaruar qëllimin e tyre për të krijuar një kod vullnetar sjelljeje për teknologjinë brenda pak javësh. Kjo nismë synon të inkurajojë demokracitë globale që të bashkëpunojnë në zbatimin e praktikave të sigurta dhe etike të AI.
Ky veprim vjen në vazhdën e një vale shqetësimi në rritje nga politikëbërësit dhe ekspertët e teknologjisë, të cilët kanë krahasuar rreziqet e AI, si ChatGPT, me ato të shkaktuara nga pandemitë, dhe madje edhe lufta bërthamore.
Zëvendëspresidentja e Komisionit Evropian, Margrethe Vestager, njoftoi planin për të propozuar kodin vullnetar gjatë një takimi të Këshillit të Tregtisë dhe Teknologjisë (TTC) midis SHBA-së dhe Europës. Ajo theksoi se kodi është një masë mbrojtëse e nevojshme, ndërkohë që ligjet më gjithëpërfshirëse të AI janë në zhvillim.
“Inteligjenca artificiale sjell një ndryshim të plotë global. Ne kemi nevojë për inteligjencë artificiale të përgjegjshme,” tha Vestager. “Duke njohur potencialin dhe fuqinë e madhe të kësaj teknologjie, ne po ecim përpara me një draft kod sjelljeje të AI, që do të publikohet brenda javëve të ardhshme.”
Komisioni planifikon të marrë pështypjet nga aktorët kryesorë të industrisë për draftin, duke i ftuar për të miratuar dhe zbatuar kodin. Vestager siguroi gjithashtu që një propozim i finalizuar për industrinë do të lëshohej “shumë, shumë shpejt”.
Ndërkohë, procesi legjislativ për Aktin Europian të AI, i cili përmban rregulla për njohjen e fytyrës dhe mbikëqyrjen biometrike, është ende duke u diskutuar. Vestager vuri në dukje se mund të duhen dy deri në tre vite që këto ligje të hyjnë në fuqi, gjë që ajo e sheh si një vonesë shqetësuese.
Përtej Atlantikut, Sekretari Amerikan i Shtetit, Antony Blinken, u angazhua në diskutime “intensive dhe produktive” rreth AI, gjatë forumit TTC në Suedi. Në një deklaratë të fundit, qindra shkencëtarë dhe drejtues të teknologjisë i bënë jehonë kësaj urgjence, duke paralajmëruar se minimizimi i rreziqeve të AI duhet të jetë një prioritet global për të parandaluar “zhdukjen” e mundshme njerëzore.
Ndër nënshkruesit e deklaratës ishte Sam Altman, CEO i OpenAI, kompania që qëndron pas ChatGPT. Altman ka propozuar më parë idenë e AI të rregullohet ose nga SHBA, ose një agjensi e pavarur ndërkombëtare.
Për më tepër, Ministri Australian i Industrisë dhe Shkencës, Ed Husic, e ka njohur gjithashtu nevojën për rregullim të kësaj teknologjie. Sipas Husic, shtetet janë gjithnjë e më shumë në favor të sigurisë që teknologjia të mos tejkalojë konsideratat etike dhe ato të sigurisë.
“Qeveria federale synon të zbatojë reforma që do të ofrojnë sigurinë se ne po minimizojnë rreziqet dhe po maksimizojmë përfitimet e kësaj teknologjie,” shpjegoi Husic.
Ky dialog ndërkombëtar tregon shqetësimin global të ndikimit të mundshëm të AI, nevojën për llogaridhënie, dhe angazhimin e përbashkët të shteteve për të siguruar që fuqia e kësaj teknologjie revolucionare të shfrytëzohet me përgjegjësi.
