TOM, ose Tikkun Olam Makers, është një lëvizje globale e komuniteteve që synojnë të ndihmojnë në zgjidhjen e sfidave të njerëzve që jetojnë me aftësi të kufizuara, të moshuarëve, dhe personave me të ardhura të ulta, përmes krijimit dhe shpërndarjes së zgjidhjeve teknologjike të përballueshme. Aktualisht, TOM është duke ndërtuar rrjetin e tij në Shqipëri, dhe po angazhon studentët e universiteteve për të ndihmuar në arritjen e misionit të tij.
Përmes krijimit të komuniteteve TOM në universitete, studentët kanë mundësi të zhvillojnë aftësitë e tyre dhe të ndihmojnë në zhvillimin e zgjidhjeve teknologjike për grupet e komunitetit që kanë nevojë për to. Ky angazhim synon të ndërtojë marrëdhënie të qëndrueshme ndërmjet studentëve dhe atyre që janë në nevojë për këto zgjidhje teknologjike.
Duke u bërë pjesë e komunitetit TOM, studentët do të kenë mundësi të shoqërohen me profesionistë nga fusha të ndryshme, të ndihmojnë në ndërtimin e komunitetit, dhe të përfitojnë nga trajnime të ndryshme nga partnerët e TOM. Këto trajnime do të ndihmojnë të rinjtë të jenë të përgatitur mbi krijimin e pajisjeve teknologjike moderne, dhe të marrin pjese në projekte që kanë ndikim të drejtpërdrejtë në jetën e njerëzve. Këto pajisje mund të prodhohen në TechSpace, që do të jetë qendra kryesore e TOM në Tiranë.
Projekti TOM në Shqipëri gjendet aktualisht në fazën e mbajtjes së sesioneve informuese në universitete për krijimin e komunitetit TOM. Objektivi i këtyre sesioneve është të nxisin studentët të bëhen pjesë e lëvizjes TOM dhe të kontribuojnë për të ndihmuar komunitete në nevojë.
Vizioni i TOM është të ndërtojë një botë në të cilën teknologjia dhe inovacioni mund të ndihmojnë të gjithë, pavarësisht të ardhurave apo mundësive të tyre. Aktualisht, TOM ka rreth 700 komunitete, ka zhvilluar mbi 213,950 produkte, dhe ka 634 projekte në të gjithë botën.
Ndërsa TOM vijon të rritet dhe të zhvillohet, angazhimi i studentëve është i domosdoshëm për arritjen e misionit të tij. Studentët janë burimi i energjisë, kreativitetit dhe inovacionit, dhe kontributi i tyre mund të ketë ndikim të madh në jetën e njerëzve që kanë nevojë për ndihmë. Të gjithë studentët e interesuar mund të aplikojnë për të qenë pjesë e TOM në këtë link.
TOM do të nisë të aplikohet fillimisht në Tiranë, për t’u shtrirë përgjatë dy viteve të ardhshme, në dhjetë qendra rinore në gjithë Shqipërinë.
Shumë shpejt, AKSHI do të mundësojë instalimin në TechSpace të pajisjeve moderne teknologjike, të cilat do të përdoren për krijimin e produkteve të para të shumëpritura inovative, me një kosto të ulët financiare për personat me aftësi të kufizuara. Ky projekt do të nisë të aplikohet fillimisht në Tiranë, për t’u shtrirë përgjatë dy viteve të ardhshme, në dhjetë qendra rinore në gjithë Shqipërinë.
