Titanët e teknologjisë kundër Kanadasë: Google dhe Meta përplasen me Kanadanë në betejën mbi lajmet online!

Në një betejë të vazhdueshme, Google dhe Meta po advokojnë fuqishëm kundër Aktit të Lajmeve Online të Kanadasë, një legjislacion që synon t’i detyrojë këta gjigandë të teknologjisë të paguajnë botuesit kanadezë të lajmeve. Kryeministri Justin Trudeau, së fundmi, i akuzoi ata për përdorimin e “taktikave të presionit” për t’iu shmangur detyrimeve të tyre financiare ndaj sektorit të medias.

I prezantuar në prill 2022, Akti i Lajmeve Online është krijuar për të siguruar që kompanitë e mëdha të internetit, si Google apo Facebook, të paguajnë para për botuesit për përmbajtjen e tyre. Kjo është një përgjigje kanadeze e ligjit australian që hyri në fuqi në vitin 2021.

Por, Google dhe Facebook nuk janë shumë të kënaqur me këtë propozim. Ata pretendojnë se propozimet e deritanishme janë shumë të ashpra, dhe po dëmtojnë qëndrueshmërinë e bizneseve të tyre. Në atë që mund të shihet si një lojë e fortë digjitale, të dyja kompanitë kanë kryer eksperimente për të kufizuar shpërndarjen dhe shikimin e përmbajtjes së lajmeve midis disa përdoruesve kanadezë, duke pilotuar se çfarë mund të ndodhë nëse ligji miratohet.

Lexo më shumë:
Çfarë do të ndodhë me lajmet në rrjetet sociale? Kalifornia ndjek Australinë në rritjen e taksave ndaj Facebook

“Fakti që këta gjigandë të internetit preferojnë t’u ndërpresin aksesin kanadezëve në lajmet lokale, sesa t’i paguajnë faqeve të lajmeve një kompensim të drejtë, është një problem i vërtetë, dhe tani ata po përdorin taktika presioni për të provuar fuqinë e tyre. Kjo taktikë nuk do të funksionojë”, tha Trudeau në një konferencë shtypi në Otava.

Google, në mbrojtjen e tij, argumenton se legjislacioni kanadez është shumë i ashpër, në krahasim me homologët e tij australianë dhe europianë. Kompania po kërkon ndryshime që përputhen me ato që konsiderohen normat ndërkombëtare. Zëdhënësi i Google, Shay Purdy, tha: “Ne kemi ardhur në tryezë me zgjidhje të arsyeshme dhe pragmatike, që do ta bënin projektligjin të funksiononte ashtu siç është planifikuar, dhe do të rrisnin investimet tona në ekosistemin e lajmeve kanadeze”. Megjithatë, Purdy përmendi gjithashtu se projektligji paraqet “probleme serioze” për shërbimet dhe produktet e Google. Javën e kaluar, Meta iu bashkua nismës së Google, duke e etiketuar projektligjin si thelbësisht të gabuar, dhe duke pretenduar se përmbajtja e lajmeve nuk sjell ndonjë vlerë ekonomike në platformat e saj.

Lexo më shumë:
Inteligjenca Artificiale fillon të sundojë në faqet e lajmeve

Ndërkohë, industria mediatike e Kanadasë ka dalë kundër këtyre gjigandëve të teknologjisë, për të mbrojtur pjesën e tyre të tregut të reklamave në internet. Kryeministri Trudeau u tregua shumë i ashpër kur tha: “Kompanitë e ndryshme të internetit, si Meta, kanë çdo vit fitime rekord, ndërkohë që në të njëjtën kohë, agjensitë e pavarura të lajmeve lokale po luftojnë për të mbijetuar. Ne duam të sigurohemi që këto korporata shumë fitimprurëse të kontribuojnë në forcimin e demokracisë sonë”.

Akti i Lajmeve Online është miratuar në Dhomën e Komunave të Kanadasë, dhe aktualisht është në pritje të miratimit nga dhoma e sipërme e parlamentit. Megjithëse dhoma e sipërme rrallëherë bllokon legjislacionin që është miratuar nga Dhoma e Komunaves, mbetet për t’u parë nëse titanët digjitalë mund të lëvizin peshoren në favor të tyre.

Lexo më shumë:
AI nuk ndalet, ChatGPT do të jetë i përditësuar me lajme në kohë reale

Tani për tani, është një përballje e ashpër midis përpjekjeve të Kanadasë për të mbështetur botuesit e saj të lajmeve, dhe kompanive teknologjike që duken të vendosur të luftojnë për të mos e mbështetur këtë propozim.