Xandr, gjigandi i reklamave të Microsoft-it, është kapur duke përdorur të dhëna sensitive të konsumatorëve. Kohët e fundit u zbulua një sasi gjigande, prej 650,000 segmentesh informacioni, të ngjashme me etiketat që do t’i vendosnit në sendet ushqimore. Markup hapi kutinë e Pandorës, duke zbuluar se si kjo platformë reklamimi mund të dijë më shumë për kënaqësitë tuaja sekrete sesa ditari juaj.
Imagjinoni këtë: Ju jeni një i ri, që dilni çdo fundjavë, që herë pas here pini kafen e pasdites në një nga lokalet e bllokut. Në botën e Xandr-it, ju jeni etiketuar si një “I ri dhe i pasur”, “Vizitor i Bllokut”, apo “Fans i jetës së natës”. Këto etiketa nuk janë vetëm pseudonime të lezetshme; ata janë të ngjashme me avatarët digjitalë që agjensitë e reklamave përdorin për t’ju shitur produkte. Nga dëshirat tuaja për kafe, deri tek kënaqësitë tuaja sekrete, ju jeni të etiketuar rregullisht.
Por, kjo nuk është çdo gjë. Ndërsa etiketimi “Fans i jetës së natës” mund të duket si diçka e vogël, dosja e Xandr-it ishte e mbushur me kategori private, si “blerësit e shpeshtë të testeve të shtatzënisë”, ose ata që kishin interes për tumoret e trurit. Barrierat e privatësisë duket se janë shembur nën ndërmarrjen ambicioze të të dhënave të Xandr, duke treguar një pamje të zymtë të një bote ku shiten detajet intime.
Wolfie Christl, një studiues i privatësisë që luajti një rol të rëndësishëm në zbulimin e këtij skedari, tha se kjo është prova më e madhe e asaj që ai e quan “ekonomia e mbikëqyrjes”. Të dhënat madje përfshinin kompanitë që kanë marrë pjesë në krijimin e këtyre kategorive, duke shfaqur bashkëpunimin e frikshëm në profilizimin e çdo klikimi tuaj.
Mbrojtësit e lirive civile kanë reaguar gjatë ditëve të fundit, me disa që e quajnë këtë skandal “kërcënimi më i madh për privatësinë e të dhënave”. Veçanërisht shqetësuese është synimi rreth temave të ndjeshme si shëndeti riprodhues. Imagjinoni të jeni të përndjekur nga reklamat e testeve të shtatzënisë, vetëm sepse dikur e keni kërkuar në Google për një mik.
Çfarë do të thotë e gjithë kjo për ju? Epo, është koha për të kuptuar se si kompanitë e reklamave veprojnë në hije. Nga preferenca juaj për hitet e Taylor Swift, deri tek varësia juaj ndaj kafes së pasdites, mbani mend – në botën online, dikush është gjithmonë duke ju vëzhguar.
Është koha të pyesim veten: A duam vërtet të etiketohemi, të futemi në qese dhe të shitemi te ofertuesi më i lartë?
