Kompanitë e rrjeteve sociale duhet të paguajnë mediat: Facebook reagon me ndërprerjen e lajmeve

Në një lëvizje të rëndësishme, Parlamenti i Kanadasë ka miratuar legjislacionin që detyron gjigandët e mediave sociale, si Facebook, të ndajnë fitimet e gjeneruara nga reklamat me botuesit e lajmeve. Ky vendim bëri që Meta, kompania mëmë e Facebook, të ndalonte shpërndarjen e lajmeve në platformat e saj në Kanada.

I njohur si Akti i Lajmeve Online, ose C-18, legjislacioni detyron firmat e Big Tech të krijojnë marrëveshje kompensimi me mediat për publikimin e përmbajtjes së tyre në platformat e teknologjisë. Facebook reagoi me shpejtësi ndaj këtij zhvillimi, duke deklaruar një ndërprerje të shpërndarjes së lajmeve në Kanada.

Siç deklaroi Meta në një postim në blog, “Për të respektuar projektligjin C-18, të miratuar sot në Parlament, përmbajtja nga mediat, përfshirë botuesit dhe transmetuesit e lajmeve, nuk do të jetë më e disponueshme për përdoruesit që hyjnë në platformat tona në Kanada”.

Qeveria kanadeze mbetet e pa surprizuar nga kundër lëvizja e Facebook. Ministri i Trashëgimisë, Pablo Rodriguez, tha: “Facebook e di shumë mirë se ata nuk kanë asnjë detyrim në këtë moment. Pas miratimit të projektligjit C-18, qeveria do të angazhohet në një proces rregullimi dhe zbatimi të aktit. Nëse qeveria nuk mund të ndihmojë kanadezët kundër gjigandëve të teknologjisë, kush do e bëjë këtë gjë?”

Artikull i ngjashëm:
Çfarë do të ndodhë me lajmet në rrjetet sociale? Kalifornia ndjek Australinë në rritjen e taksave ndaj Facebook

Strategjia e Facebook për të kërcënuar për heqjen e lajmeve nuk është e paprecedentë. Kompania ka përdorur taktika të ngjashme gjatë mosmarrëveshjeve të mëparshme me qeveri të ndryshme. Ndërkohë, gjigandi i motorit të kërkimit, Google, është tërhequr gjithashtu nga negociatat me qeverinë kanadeze. Kompania shprehu synimin e saj për të gjetur një zgjidhje që nuk do të rezultojë në ndërprerjen e shërbimeve të lajmeve në Kanada.

Në Shtetet e Bashkuara, Kongresi po diskuton mbi një projekt-ligj të ngjashëm të quajtur Akti i Konkurrencës dhe Ruajtjes së Gazetarisë (JCPA). Projektligji u paraqit në mandatin e kaluar në Komitetin Gjyqësor të Senatit, por nuk u miratua për shkak të mosmarrëveshjeve rreth ndryshimeve.

Artikull i ngjashëm:
Titanët e teknologjisë kundër Kanadasë: Google dhe Meta përplasen me Kanadanë në betejën mbi lajmet online!

Meta ka lëshuar kërcënime të ngjashme në lidhje me JCPA, e cila aktualisht është në pritje të shqyrtimit në Senat. Megjithatë, parashikohet të përballet me kundërshtime në Dhomën e Përfaqësuesve, pasi Kryetari i Dhomës, Kevin McCarthy, theksoi se projektligji do të ishte shumë i dëmshëm për demokracinë Amerikane.

Vlen të përmendet se Facebook më parë kishte vendosur një ndalim për shpërndarjen dhe shikimin e lajmeve në Australi. Ky veprim ishte në përgjigje të ligjit të Australisë që detyronte kompanitë e Big Tech të shpërblenin mediat për përmbajtjen e tyre. Megjithatë, ky ndalim u anulua brenda disa ditësh, për shkak të presionit ndërkombëtar.