New York diskuton mbi ndalimin e mediave sociale për të rinjtë

Komisioneri i Shëndetësisë i qytetit të New York-ut, Dr. Ashwin Vasan, është zotuar të ndërmarrë veprime konkrete kundër platformave të mediave sociale, të cilat ai i konsideron një “toksinë digjitale” që kontribuojnë në përshkallëzimin e krizës së shëndetit mendor midis të rinjve të qytetit. Me synimin për të rregulluar këto platforma, ashtu si çdo kërcënim për shëndetin publik, Dr. Vasan këmbëngul në domosdoshmërinë e ndërhyrjes së qeverisë.

“Edukimi, avokatia, kërkimi, vlerësimi, politika dhe rregullimi janë në planin afatgjatë,” tha Vasan, duke pranuar se arritja e këtyre objektivave mund të sjellë procese gjyqësore. Angazhimi i tij për të trajtuar këtë çështje ka gjetur mbështetje nga kryetari i bashkisë së NYC, Eric Adams, dhe qyteti në përgjithësi.

Së fundmi, kryebashkiaku Adams dhe Dr. Vasan mbajtën një konferencë ku përfshiheshin profesionistë të shëndetit mendor, edukatorë, grupe prindërish, agjensi qeveritare dhe nxënës të shkollave të mesme. Objektivi ishte ndërtimi i një strategjie për ruajtjen e mirëqenies mendore të fëmijëve dhe adoleshentëve në situatën e efekteve të dëmshme të mediave sociale, siç raportohet nga Kirurgu i Përgjithshëm i SHBA dhe Shoqata Psikologjike Amerikane.

Dr. Vasan iu referua platformave të mediave sociale si “ekspozim i parregulluar”, duke argumentuar se ato janë të ngjashme me të luajturit “Ruletën ruse me fëmijët tanë”. Një ilustrim i qartë i këtyre efekteve të dëmshme është një llogari e mediave sociale e drejtuar në mënyrë anonime, e fokusuar në turpërimin e studentëve të shkollës së mesme New Dorp, e cila ka më shumë se 250 postime që nga prilli.

Artikull i ngjashëm:
Verifikimi i moshës së përdoruesëve të rrjeteve sociale: Si mund të mbrojmë fëmijët tanë?

Statistikat alarmante përforcojnë shqetësimet e Vasan-it. Sipas studimit, 38% e nxënësve të shkollave të mesme të New York-ut raportuan se ndiheshin kaq të dëshpëruar për të paktën dy javë në vitin e kaluar, saqë i ndërprenë aktivitetet e tyre të rregullta. Normat e mendimeve për vetëvrasje mes nxënësve të shkollave të mesme janë rritur me mbi 34% në dekadën e fundit, me norma disproporcionale më të larta mes studentëve nga zonat e marxhinalizuara.

Rreziqet në internet variojnë nga ekspozimi ndaj imazheve të papërshtatshme, shtrembërimet e imazhit të trupit, deri te komentet mizore anonime që mund të dëmtojnë të rinjtë në shoqëri. “Gjërat që njerëzit ju thonë në internet, nuk janë të njejta me ato që ju thonë përballë”, vuri në dukje Vasan.

Artikull i ngjashëm:
Drejtori i Apple këshillon prindërit t’i mbajnë fëmijët larg ekranit të telefonit

Plani i shëndetit mendor i Adams përmban një program digjital të shëndetit mendor për adoleshentët e shkollave të mesme të qytetit, një program pilot për parandalimin e vetëvrasjeve për të rinjtë, dhe një program parandalimi të vetëvrasjeve me bazë në komunitet që fokusohet te komunitetet e marxhinalizuara.

Dr. Vasan përfundoi duke theksuar rëndësinë e ofrimit udhëzimeve për prindërit, mbi mënyrën se si t’i mbajnë fëmijët e tyre të sigurtë në internet, njëlloj si udhëzimet e dhëna për produktet e tjera që përdorin fëmijët e tyre. Angazhimi i tij, së bashku me qytetin, është të formësojë rregulla dhe udhëzime për të rregulluar ekspozimin digjital me të cilin përballen fëmijët sot.