Apple ka vendosur të eliminojë portën tradicionale të karikimit Lightning, në favor të një porte USB-C për iPhone 15, që do të publikohet zyrtarisht më 12 shtator.
Ky vendim është në përputhje me një ligj të ri të Bashkimit Europian (BE) që detyron prodhuesit e smartphone-ve të standardizojnë metodat e karikimit deri në dhjetor 2024. Ligji synon të reduktojë mbetjet elektronike dhe të kursejë paratë e konsumatorëve.
Ndërsa iPad-ët e rinj të Apple tashmë kanë porte USB-C, gjigandi i teknologjisë fillimisht i kishte rezistuar përpjekjes së BE-së për një portë të vetme universale të karikimit. Në shtator 2021, një zëdhënës i Apple i tha BBC-së, “Rregullorja e rreptë mbyt inovacionin dhe dëmton konsumatorët në mbarë botën”.
Megjithatë, ndryshimi duket i pashmangshëm. Pajisjet për të përshtatur portën Lightning në USB-C kanë qenë në treg prej disa kohësh nga tregtarë të ndryshëm, përfshirë Amazon. Që nga publikimi i iPhone 8 në vitin 2017, smatphone-t e Apple kanë pasur gjithashtu mundësinë e karikimit wireless.
iPhone 14, modeli më i ri aktualisht në treg, mund të jetë modeli i fundit që përdor ekskluzivisht portin Lightning, duke sinjalizuar largimin e mundshëm të këtij porti.
Nuk është ende e qartë nëse porti USB-C do të jetë një standard global, apo i zbatueshëm vetëm për iPhone-ët e shitur në BE. Megjithatë, analistët argumentojnë se nuk ka gjasa që Apple të prodhojë dy versione të të njëjtit telefon.
Përfitimet e ndryshimit përfshijnë karikimin e thjeshtë në të gjithë linjën e produkteve të Apple, pasi iPad, Mac dhe tani iPhone do të përdorin të njejtin tip porte. Gjithashtu, ky përditësim do të sjellë ritme më të shpejta të transferimit të të dhënave, siç raportohet nga Bloomberg.
Rregulli i BE-së për karikimin e standardizuar do të zbatohet për një gamë të gjerë të pajisjeve elektronike të vogla dhe të mesme, nga lexuesit elektronikë dhe kamerat digjitale, deri te pajisjet GPS dhe altoparlantët portativë. Ky ligj parashikohet t’i kursejë konsumatorëve deri në 213 milionë euro në vit, dhe të reduktojë mbetjet elektronike me 11,000 tonë në vit.
Kalimi në USB-C e afron Apple me rivalët si Samsung, dhe e përgatit kompaninë për rregulloret e ardhshme të BE-së. Ndërsa disave mund t’ju mungojë porti Lightning, përfitimet e një karikuesi universal mund të tejkalojnë nostalgjinë.
