Gjigandi i transmetimit dhe prodhimit të filmave po planifikon të hapë dy shtëpitë e para Netflix (Netflix Houses) në SHBA në vitin 2025, duke ofruar mundësi për blerje, ushqim dhe aktivitete të lidhura me prodhimet e fundit kinematografike.
Duke alternuar argëtimin me shopping, këto hapësira fizike po hapin rrugën për një lloj të ri aktiviteti, të panjohur më parë për fansat. Pas testimit të shitjeve përmes Netflix Bites, një pikë pop-up e frymëzuar nga programet e kuzhinës në Los Anxheles qershorin e kaluar, brandi i njohur duket i bindur se ka shumë potencial edhe jashtë ekranit të televizorit apo kompjuterit.
“Netflix është tashmë një destinacion për programet e preferuara të ushqimit, nga dokumentarët te kompeticionet televizive,” tha në një deklaratë për shtyp Josh Simon, zëvendës president i produkteve të konsumit. “Nga episodi në hyrje, me Netflix Bites ne po krijojmë një përvojë të personalizuar ku fansat mund të marrin pjesë në spektaklet e tyre të preferuara të ushqimit.”
Kjo nismë shfaqi një interes nga kompania për të ofruar një përvojë unike për përdoruesit e Netflix, duke i dhënë kompanisë mundësinë për të testuar një ide që po bëhet pjesë e një strategjie afatgjatë.
Netflix ka krijuar gjithashtu pop-ups të përkohshëm vitin e kaluar për të festuar disa nga filmat e tij më të njohur në vende të ndryshme, përfshirë Japoninë, ku fansat e zakonshëm janë veçanërisht të përkushtuar. Në maj, ngjarja “Vetëm në Netflix” rikrijoi skena të Stranger Things dhe Emily në Paris, 2 super hite të platformës, për t’i lejuar fansat të përjetojnë dhe të përfshihen në film, përmes dekorit, muzikës së përzgjedhur dhe ushqimit. Tashmë, synimi për të marrë këtë lloj iniciative bëhet më i fortë me shpalljen e “Netflix Houses”, pasi ato janë vendosur të bëhen qendra komerciale të përhershme.
