Çfarë i bashkon Eugent Bushpepën dhe Renis Gjokën përveç muzikës? Natyrisht miqësia e tyre e ngushtë, por së fundmi edhe një projekt që nuk e kishim pritur por na surprizoi për mirë; podcast-i i tyre “Garage Lock”.
Gjatë 2 viteve të fundit, kjo mënyrë e re komunikimi, të cilën shumë e quajnë “radio në internet” ka fituar audiencën e vetë. Podcast-e si “Zë me Mirën” nga Mira Kazhani apo edhe “Flasim” nga kryeministri Edi Rama kanë patur sukses e mesa duket 2 artistët vendosën t’ bashkohen trendit më të fundit si një mënyrë për të qenë më të pranishëm për dëgjuesit dhe fansat e tyre besnikë.
“Garage Lock” startoi ditën e mërkurë, më 8 Nëntor, me episodin e parë në kanalin e dedikuar të Youtube. Fituesi i Festivalit të Këngës në vitin 2017, bëri hyrjen e podcast-it me një Cover të Gotthard “What I Wouldn’t Give” e cila i shkonte më shumë se përshtat mbrëmjes së të mërkurës me shi. Më pas artistët prezantuan të ftuarin special të episodit të parë, siç u shpreh Gjoka “miku jonë dhe i papërsëritshmi Florjan Binaj”.
Mes humorit dhe bisedave për artin, familjen, pasionin për pikturë të Binajt, Bushpepa zbuloi gjithashtu se edhe për të, mënyra më e mirë për t’u qetësuar është piktura, dhe jo muzika siç shumë mendojnë. Ajo që të bën përshtypje, ështe sesi 2 rrok-erët më të mirë shqiptarë, promovuan në këtë podcast rëndësinë e familjes, rritjes dhe edukimit të fëmijëve me vlera dhe parime, duke kritikuar materializin e tepruar në shoqërinë shqiptare.
Podcast-i u mbyll me një nga këngët e albumit të fundit të Gjokës “Ëndrra jonë” në versionin akustik pa zbuluar asgjë mbi episodin e rradhës.
