Edicioni i 26-të i Panairit Kombëtar të Librit fton të gjithë lexuesit të mbajnë në duar një libër të ri të blerë me pak ose më pak akoma zbritje në çmim. Megjithatë, ka një lexues jo krejt të ri për të cilin ky panair nuk ka menduar fort: Ai që preferon eBooks.
Versioni ecofriendly i librave nuk është i panjohur për lexuesin shqiptar, por është vështirë i gjendshëm kur je duke kërkuar botime në gjuhën shqipe, aq më shumë nga autorë vendas. Ndërsa bëmë një vizitë në disa prej shtëpive botuese të prezantuara në panair, shumica e asistentëve të shitjes nuk kishin informacion mbi faktin nëse shtëpia botuese për të cilën po punonin ofronte versionin eBook, pra digjital, të ndonjërit prej titujve të tyre, e disa të tjerë u përgjigjën thjesht me jo. Vetëm tek stenda e shtëpisë botuese Dituria na u tha se disa prej titujve të tyre mund t’i gjenim në versionin eBook tek Shtëpia e Librit me një zbritje prej 20% nga kopertina.
Pas vizitës në panair, vizitojmë edhe disa nga faqet zyrtare online të shtëpive botuese si Dudaj, Onufri, Pegi, OmbraGVG, Albas e Toena mes të cilave, vetëm në portalin e Toena-s gjejmë një rubrikë të dedikuar për eBooks. Në këtë listë do të gjeni tituj shqiptarë nga autorë si Fatos Kongoli, Besnik Mustafaj dhe përkthime të ndryshme nga autorë të huaj. Megjithatë, lista është e kufizuar.
Natyrisht, shitja e librave siç thuhet rëndom, në versionin PDF, ka një risk të dukshëm, atë të shpërndarjes së materialit në mënyrë jo të ligjshme. Në krye të çdo eBook lexuesi “ftohet” të ndërmarrë një qëndrim etik në respekt të të drejtave të autorit dhe të mos e shpërndajë atë tek lexuesit e tjerë. Ky “premtim” në praktikë ka pak vlerë sepse qasja e blerësit të parë nuk mund të mbahet nën kontroll dhe shpërndarja ilegale mund edhe të dëmtojë shitjet.
Në ditët e sotme, kur digjitalizimi ka transformuar format e marrjes së informacionit dhe ka shkurtuar rrugët, është pak të kërkohet një ofertë më e gjerë e eBooks në shqip, ndaj thirrja për të gjitha shtëpitë botuese shqiptare është të investojnë pak më tepër në këtë drejtim, për të kënaqur edhe lexuesin digjital, qoftë atë që jeton jashtë vendit dhe nuk është në gjendje t’i aksesojë librat fizikisht, qoftë atë që është i përkushtuar ndaj praktikave ecofriendly, e qoftë atë, që preferon të ketë privilegjin e madh që në nje Kindle disa gramësh, të mbajë qindra libra.
