Neuralink implantoi një pacient të dytë me çip truri, thotë Elon Musk

Neuralink ka implantuar me sukses në një pacient të dytë pajisjen e saj të krijuar për t’u dhënë pacientëve të paralizuar aftësinë për të përdorur pajisjet digjitale vetëm duke menduar, sipas pronarit të startup-it, Elon Musk.

Pajisja ka lejuar pacientin e parë të luajë video lojëra, të shfletojë internetin, të postojë në rrjetet sociale dhe të lëvizë kursorin në laptopin e tij.

Musk, në komentet e bëra gjatë një podkasti të transmetuar vonë të premten, që zgjati më shumë se tetë orë, dha pak detaje për pjesëmarrësin e dytë përveçse tha se personi kishte një dëmtim të shtyllës kurrizore të ngjashme me pacientin e parë, i cili ishte i paralizuar në një aksident zhytjeje. Musk tha se 400 nga elektrodat e implantit në trurin e pacientit të dytë janë duke punuar. Neuralink në faqen e saj të internetit thotë se implanti i tij përdor 1024 elektroda.

Lexo edhe: Elon Musk: Pacienti i parë i ‘Neuralink’, i aftë të kontrollojë objektet përmes mendimeve

“Nuk dua të flas para kohe, por duket se ka shkuar jashtëzakonisht mirë me implantin e dytë,” i tha Musk prezantuesit të podcast-it Lex Fridman. “Ka shumë sinjal, shumë elektroda. Po funksionon shumë mirë.”

Musk nuk bëri të ditur se kur Neuralink kreu operacionin e pacientit të dytë. Musk tha se pret që Neuralink të sigurojë implantet për tetë pacientë të tjerë këtë vit, si pjesë e provave klinike të saj.
Pacienti i parë, Noland Arbaugh, u intervistua gjithashtu në podcast, së bashku me tre drejtues të Neuralink, të cilët dhanë detaje se si funksionon implanti dhe operacioni i drejtuar nga roboti.