Apple, po planifikon të lançojë një ekran të montueshëm në mur që mund të kontrollojë pajisjet, të trajtojë video-konferencat dhe të përdorë inteligjencën artificiale për të naviguar aplikacionet, raportoi Bloomberg News të martën.
Produkti, me emrin e koduar J490, mund të shpallet që në mars, thuhet në raport, duke shtuar se do të vërë në pah platformën e re të AI, Apple Intelligence.
Apple nuk iu përgjigj menjëherë një kërkese të Reuters për koment.
Pajisja e nivelit më të lartë mund të kushtojë deri në 1000 dollarë në varësi të komponentëve që përdoren, thuhet në raport, por pajisja vetëm me ekran do të ishte shumë më pak se kaq.
Lansimi i mundshëm i pajisjes do të vijë pasi gjiganti i teknologjisë duket se do të konkurrojë me rivalët në tregun e shtëpive inteligjente, duke përfshirë ekranet inteligjente të Google, Nest Hub dhe Amazon, Echo Show dhe Echo Hub.
Lexo edhe: Apple do të përballet me gjobën e parë të BE-së për rregullat e App Store
Tableti i murit me AI, i cili duket si një iPad katror dhe ka madhësinë e dy iPhone-ve krah për krah, ka një ekran afërsisht 6 inç dhe do të ofrohet në ngjyrat e argjendta dhe të zeza, tha Bloomberg News.
Produkti do të jetë një pajisje e pavarur, por do të kërkojë një iPhone për disa detyra, thuhet në raport.
