Rusia pretendon se ka zhvilluar vaksinën kundër kancerit, që do të shpërndahet falas

Rusia pretendon se ka zhvilluar një vaksinë mRNA kundër kancerit, ka raportuar agjencia ruse e lajmeve TASS. Vaksina do t’u shpërndahet pacientëve me kancer falas, tha për Radio Rossiya Drejtori i Përgjithshëm i Qendrës Kërkimore Mjekësore të Radiologjisë të Ministrisë së Shëndetësisë Ruse, Andrey Kaprin.

Vaksina është zhvilluar në bashkëpunim me disa qendra kërkimore dhe pritet të dalë për përdorim publik në fillim të vitit 2025.

Provat para-klinike të vaksinës kishin treguar se ajo shtyp zhvillimin e tumorit dhe metastazat e mundshme, tha për TASS Drejtori i Qendrës Kombëtare të Kërkimit për Epidemiologjinë dhe Mikrobiologjinë Gamaleya, Alexander Gintsburg.

Çfarë është një vaksinë mRNA?

Vaksinat mARN ose mesazher-ARN përdorin pjesë specifike të agjentit infektiv si proteina, sheqeri ose mbulesa e tij. Vaksina mRNA u jep një mesazh qelizave tona për të bërë një proteinë apo edhe vetëm një pjesë të një proteine ​​që janë si ato të virusit. Proteina më pas shkakton një përgjigje imune brenda trupit tonë.

Lexo edhe: Testi i ri me Inteligjencë Artificiale mund të zbulojë kancerin e gjirit në fazën më të hershme 

Më parë, në një intervistë për TASS, Z. Gintsburg kishte thënë se përdorimi i rrjeteve nervore artificiale mund të zvogëlojë kohëzgjatjen e llogaritjes së nevojshme për të krijuar një vaksinë të personalizuar kundër kancerit në më pak një orë.