Pse vajzat duhet të marrin në konsideratë teknologjinë si karrierë në 2025

Në një kohë kur teknologjia është shtylla kurrizore e çdo industrie dhe ndryshimet ndodhin me ritme marramendëse, përfaqësimi i ulët i vajzave dhe grave në këtë fushë mbetet ende një shqetësim global. Por pikërisht këtu qëndron mundësia: për të thyer stereotipet dhe për të ndërtuar një karrierë të qëndrueshme, të mirëpaguar dhe të pasur me sfida kreative.

Të hysh në teknologji, pa një rrugë tradicionale? Është më se e mundur

Shumë profesionistë të teknologjisë nuk kanë ndjekur rrugë tradicionale për të hyrë në këtë fushë. Disa kanë filluar si asistentë administrativë, të tjerë me diploma në arte apo shkenca sociale. Ajo që i ka bërë të suksesshëm është dëshira për të mësuar, përshtatshmëria dhe këmbëngulja. Nëse je vajzë dhe nuk ndihesh “e mirë në matematikë”, mos u dekurajo. Teknologjia nuk është vetëm për koduesit brilantë apo për ata që kanë ndërtuar kompjuterë që në fëmijëri. Ajo ka hapësirë për krijues, mendje analitike, komunikatorë të shkëlqyer dhe problem-zgjidhës të apasionuar.

Shembulli i një lidereje me sfond të pazakontë

Autorja e këtij shkrimi, sot lidere në fushën e teknologjisë dhe e vlerësuar në nivel kombëtar në SHBA, ka filluar karrierën me një diplomë në komunikim. Rrugëtimi i saj drejt teknologjisë nisi pa plan, kur u rekrutua në një departament IT që drejtohej nga një grua,  një moment që, ndonëse atëherë nuk u kuptua si transformues, në fakt ishte pikënisja e një karriere të suksesshme. Ajo filloi të ndërtonte faqe interneti, të zhvillonte porta digjitale dhe databaza,  të gjitha duke u mbështetur jo te kodimi, por te aftësitë e saj për të kuptuar njerëzit dhe për t’i komunikuar zgjidhjet në mënyrë të qartë. Kjo e bëri të veçohej në mesin e kolegëve teknikë. Teknologjia ka ende një problem me përfaqësimin gjinor dhe paragjykimet ndaj grave. Autorja ndan një episod ku refuzoi një ofertë pune sepse, ndonëse ishte e kualifikuar, iu bë e qartë se do përballej me mungesë respekti për shkak të gjinisë së saj. Megjithatë, në vend që ta ndalte, kjo e motivoi më shumë. Zgjodhi të vijonte një diplomë të dytë në Sistemet e Informacionit dhe të përqafonte me bindje karrierën në teknologji. Ajo vendosi të përdorte paragjykimin si karburant për të ndërtuar suksesin e saj.

Lexo edhe: Eurostat: Të rinjtë shqiptarë të fundit në Europë për njohuritë digjitale

Stabilitet dhe mundësi afatgjata

Për shumë vajza, teknologjia mund të jetë rruga drejt pavarësisë dhe stabilitetit financiar. Për autoren, që nuk kishte pasur mbështetje në vendimmarrje akademike në rini, karriera në teknologji ofroi për herë të parë ndjesinë se dikush – në këtë rast, një punëdhënës – ishte gati të investonte tek ajo. Sot, ajo e kupton se suksesi i saj nuk erdhi përkundër sfondit të pazakontë, por falë tij. Pikërisht aftësitë e saj të ndryshme,  komunikimi, mendimi strategjik, kreativiteti , janë ato që e kanë bërë të vlefshme në çdo skuadër teknologjike.

Pse duhet ta konsiderosh TI si karrierë?

• S’ka nevojë për një rrugë klasike – mund të vish nga çdo disiplinë.
• Kërkon kreativitet, zgjidhje problemesh dhe punë në ekip.
• Pagat janë të larta dhe mundësitë janë të pafundme.
• Kërkohen më shumë gra për të balancuar dhe përmirësuar inovacionin.
• Fusha është në zgjerim të vazhdueshëm, gjithmonë ka vend për ty.

Nëse ke dëgjuar deri më tani për teknologjinë vetëm nga perspektiva e burrave programues apo ekspertëve teknikë, është koha të dëgjosh edhe zërin e një gruaje që ka ndërtuar suksesin në këtë botë nga një këndvështrim tjetër. Teknologjia nuk është vetëm kod. Është bashkëpunim, vizion, zgjidhje dhe ndikim. Nëse je vajzë dhe po pyet veten se cili mund të jetë drejtimi yt në 2025, konsidero me serioz teknologjinë. Mund të jetë pikërisht aty ku nis rruga jote drejt suksesit, ndikimit dhe pavarësisë./FORBES