Një emër i ri po qarkullon në korridoret e Hollywood-it dhe thuhet se është pranë debutimit në ekranin e madh. Por ka një kthesë të madhe: ajo nuk është njeri. Tilly Norwood është një aktore tërësisht e krijuar nga inteligjenca artificiale (AI), duke ndezur një valë polemikash mbi të ardhmen e artit dhe kinemasë.
Pas saj qëndron aktorja dhe krijuesja holandeze Eline Van der Velden, e cila përmes studios së saj Xicoia – një degëzim i kompanisë AI Particle6 – po synon të fusë në industrinë e filmit dhe televizionit “talente digjitale”. “Qëllimi është që Tilly të bëhet Scarlett Johansson-i ose Natalie Portman-i i ardhshëm,” tha Van der Velden këtë verë, kur prezantoi Tilly-n përmes rrjeteve sociale. Aktualisht, llogaria e saj në Instagram numëron mbi 39 mijë ndjekës.
Interesi nga industrisë duket se po rritet. Në Zurich Summit, pjesë e Festivalit të Filmit në Zyrih, Van der Velden zbuloi se disa studio tashmë po zhvillojnë projekte të ngjashme me AI. Ndërkohë, Tilly ka marrë edhe rolin e saj të parë në një skeç komik me titull AI Commissioner.
“Publiku kujdeset për historinë, jo për faktin nëse ylli ka puls,” shkroi Van der Velden në një postim në LinkedIn, duke sugjeruar se epoka e aktorëve sintetikë ka nisur.
Megjithatë, ideja që një “aktor” i krijuar nga AI të përfaqësohet nga një agjenci talentesh ka ndezur zemërim dhe debat të ashpër. Komentet në rrjetet sociale variojnë nga “Ky është fundi i industrisë siç e njohim” deri tek “Kjo është fyese dhe thellësisht e gabuar”.
Reagimet nga aktorët e vërtetë kanë qenë edhe më të forta. Fituesja e Golden Globe, Toni Colette, reagoi me emoji ulëritës, ndërsa aktorja dhe regjisorja Natasha Lyonne tha se çdo agjenci që përfshihet në këtë praktikë duhet të bojkotohet nga të gjitha sindikatat. Po ashtu, aktorja Emily Blunt e përshkroi krijimin si “të frikshëm” në një intervistë me Variety.
Aktorja Kiersey Clemons kërkoi transparencë, duke bërë thirrje që të publikohen emrat e agjencive të përfshira, ndërsa aktorja Mara Wilson shkroi në Instagram: “Turp për këta njerëz. Kanë vjedhur fytyrat e qindra grave të reja për të krijuar këtë ‘aktore’ AI. Ata nuk janë krijues, por hajdutë identiteti.”
Ndërsa disa e shohin Tilly Norwood si të ardhmen e industrisë digjitale, të tjerë paralajmërojnë se mund të jetë fillimi i fundit për artin e aktorëve të gjallë. Pyetja që mbetet është: a do ta përqafojë publiku një aktore që nuk ekziston?
